دەوڵەتی یاسا: ئاگاداری جموجۆڵی شانە نوستووەکانی حیزبی بەعس بن

ئاڤا نیوز

 

دوای ئەوەی نووری مالیکی، سەرۆکی هاوپەیمانی دەوڵەتی یاسا لە ماوەی چەند ڕۆژی ڕابردوو، هۆشداریی لە مەترسی گەڕانەوەی شانە نوستووەکانی حیزبی بەعس دا، لەلایەن بەشێک لەسوننەکانەوە ڕووبەڕووی ڕەخنە بووەوە. 

 

وێنە گەورەکە: نووری مالیکی، سەرۆکی هاوپەیمانیی دەوڵەتی یاسا، لە چاوپێکەوتنێکی میدیایدا داوایەکی ئاڕاستەی حکومەت کرد، باسی لەوەکرد دەبێت بەوپەڕی هێز و تواناوە ڕێگری لە دووبارە خۆ ڕێکخستنەوەی شانە نوستووەکانی حیزبی بەعس بکرێت کە لەچەند وڵاتێک و هەرێمێک جارێکی دیکە خەریکی دووبارە خۆ ڕێکخستنەوەن. 

 

لێدوانی فەرمی: نیهال شەممەری ، پەرلەمانتار لە فراکسیۆنی عەزم بە ئاڤا میدیای گوت: ناکرێت دوای ئەو هەموو ساڵە باسی پاشماوەی حیزبی بەعس بکەین، بەتایبەتی ئەو حیزبە لە عێراق قەدەغەکراوە و بۆی نییە هیچ چالاکییەک ئەنجام بدات و زۆربەی سەرکردەکانی لە ژیاندا نەماون و بەشێکیشیان بەساڵاچوون.

 

لەلایەکی دیکەوە: سائیر جبووری، پەرلەمانتاری عێراق لە هاوپەیمانیی دەوڵەتی یاسا بۆئاڤا میدیا ڕایگەیاند: قسەکانی مالیکی هیچ پەیوەندی بەبانگەشەی هەڵبژاردنی پێشوەختەوە نییە، ئەو لە قسەکانی ڕێگریکردنە لە گەڕانەوەی بەعسییەکان لەژێر هەر پاساو و ناوێک بێت.