پڕۆژەی پرد و ڕێگای تووە قوت جموجوڵی بازرگانیی لە دەروازەی شوشمێ ئاسان دەكات

ئاڤا نیوز

دانانی بەردی بناغەی پڕۆژەی پرد و ڕێگای تووە قوت لە سنووری پارێزگای هەڵەبجە بە ئامادەبوونی سەرۆكوەزیران بارزانی، دەرچەیەكی گرنگ بەڕووی جموجۆڵی بازرگانیی لەنێوان هەڵەبجە و گەرمیان، شارەكانی ناوەڕاست و خوارووی عێراق دەكاتەوە.

بۆچی گرنگە: بە تەواوبوونی ئەو پرد و ڕێگەیە كارئاسانی دەكات، بۆ ئەوەی ئەو كاڵا و كەل و پەلانەی لە ڕێگەی شوشمێوە دێنە هەڵەبجە، هەناردەی سلێمانی، گەرمیان، شارەكانی ناوەڕاست و خوارووی عێراق بكرێن.

لێدوانی فەرميی: كاوە عەلی، جێگری پارێزگاری هەڵەبجە بۆ ئاڤا نیوز گوتی: "پرد و ڕێگای تووە قووت درێژی پردەكە 360 مەترە، رێگاكە و پردەكە 27 كیلۆمەترە، مەودای ڕێگا بۆ گەشتیارانی عێراق كورتدەكاتەوە، بە ماوەیەكی كەمتر دەتوانن سەردانی ناوچە گەشتیارییەكانی سنووری پارێزگای هەڵەبجە بكەن".

باكگراوند: دەروازەی سنووریی شوشمێ لە دیوی باشووری كوردستان كەوتووەتە سنووری شارەدێی تەوێڵە و 32 كیلۆمەتر لە ناوەندی پارێزگای هەڵەبجە دوورە. لە دیوی رۆژهەڵاتی كوردستانیش لە سنووری شارۆچكەی نەوسودی سەر بە شاری پاوەی پارێزگای كرماشانە، 27-06-2023، دەروازەی شوشمێ بە فەرمی لە نێوان باشووری كوردستان و ڕۆژهەڵاتی كوردستان بۆ هاتووچۆی گەشتیاری كرایەوە.