وادەی یەکەم کۆبوونەوەی خولی شەشەمی پەرلەمانی کوردستان ئاشکرا دەکرێت

ئاڤا نیوز 

 

سەرۆكی دیوانی پەرلەمانی كوردستان، زانیاریی سەبارەت بە كاتی بەڕێوەچوونی یەكەم كۆبوونەوەی خولی شەشەمی پەرلەمانی كوردستان ئاشكرا دەكات و ڕایدەگەیێنێت كە بەتەمەنترین ئەندام سەرۆكایەتیی دانیشتنەكە دەكات.

 

لێدوانی فەرمی: ئەردەلان محەمەد، سەرۆکی دیوانی پەرلەمانی کوردستان بە ئاڤای ڕاگەیاند: دوای یەکلاییکردنەوەی تانەکان 10 ڕۆژ لەبەردەستی سەرۆکی هەرێمی كوردستانە تاوەکو مەرسووم دەربکات، دواتر ئەگەر هەماهەنگی هەبێت، ڕۆژێک بۆ یەکەم دانیشتنی ئەم خولەی پەرلەمان دیاری دەکرێت.

 

لەلایەكی دیكەوە: سەرۆكی دیوانی پەرلەمانی كوردستان ئاماژەی بە ئەوە دا، بەگوێرەی پەیڕەوی ناوخۆی پەرلەمان، بەتەمەنترین ئەندامی هەڵبژێردراو، سەرۆکایەتیی دانیشتەکان دەکات تا ئەو کاتەی سەرۆک، جێگر و سکرتێری پەرلەمان هەڵدەبژێردرێن. 

 

باكگراوند: ڕۆژی هەینی، 18-10-2024، دەنگدانی تایبەت و ڕۆژی یەکشەممەش، 20-10-2024، دەنگدانی گشتیی بۆ هەڵبژاردنی خولی شەشەمی پەرلەمانی کوردستان بەڕێوەچوو و بەپێی ئەنجامەكان، پارتی دیموكراتی كوردستان پلەی یەكەمی لایەنە بەشداربووەكانە بە 39 كورسی و هەر خۆیشی پێكهێنەری سەرەكیی كابینەی دەیەمی حكومەت دەبێت.