سەعدی ئەحمەد پیرە: ترسمان هەیە ئەوەی بە ئاگر و ئاسن بەرامبەر کورد نەدەکرا بە دیموکراسی بکرێت

ئاڤا نیوز

 

سەعدی ئەحمەد پیرە، گوتەبێژی یەکێتیی نیشتمانیی کوردستان لەبارەی سەرژمێریی گشتیی ڕایگەیاند، "ترسمان هەیە ئەوەی بە ئاگر و ئاسن نەتوانرا بکرێت، ئێستا بە دیموکراسی بیکەن".

لێدوانی فەرمی: سەعدی ئەحمەد پیرە لە کۆنگرەیەکی ڕۆژنامەوانیدا سەبارەت بە پرسی سەرژمێریی گشتیی ڕایگەیاند، "عەرەب لەوسەری دنیا هێنراون لە کەرکووک نیشتەجێ کراون و کورد دەرکراون، لە ساڵی 2003ـوە باسی سەرژمێریی دانیشتووان کراوە بەڵام هەر دواخراوە، ئێمە پێمان وابووە ئەوکاتە سەرژمێری دروست و بێگەرد دەبێت، ئەگەر ماددەی 140 جێبەجێکرا و بارودۆخ ئاسایی کرایەوە، ئەو کوردانەی تەعریب کراون ببرێنەوە جێگەی باو و باپیرانیان.

 

زانیاریی زیاتر: گوتەبێژی یەکێتی داوایەک ئاراستەی هاونیشتمانییانی ناوچە کوردستانییەکانی دەرەوەی ئیدارەی هەرێمی کوردستان دەکات و دەڵێت: سەرژمێری بابەتێکی نیشتمانیی و نەتەوەیی گشتگیرە، نەکەن بڵێن ناچین، ئەمە پرسی هیچ حزب و لایەنێک نییە، پرسێکی نیشتیمانی گشتگیرە، داواکارین هاووڵاتییان بچنەوە شوێنەکانی خۆیان و لە ڕۆژی سەرژمێری لەوێ ئامادەبن."

 

ئەوەی پێویستە بیزانیت: بڕیارە لە 16 تا 21- 11- 2024 پڕۆسەی سەرژمێری لە عێراق و هەرێمی کوردستان بەڕێوەبچێت و بۆ ئەم مەبەستە دوو ڕۆژ قەدەغەی هاتووچۆ ڕادەگەیێنرێت.