حاڵەتەكانی گیانلەدەستدان لەنێو چاكسازیی گەورانی سلێمانی لە زیادبوونن

ئاڤا نیوز

 

ژمارەی ڕووداوەكانی هەوڵی هەڵهاتن و گیانلدەستدانی سزادراوانی نێو چاكسازیی گەورانی سلێمانی  لە زیادبوونە و لەنوێترین ڕووداودا ئەمڕۆ سزادراوێك بە هۆكاری نادیار گیانی لەدەست دا.

 

زانیاریی تایبەت: بەپێی زانیارییەكانی ئاڤا نیوز، ئەمڕۆ سزادراوێك بە ناوی (م.چ) تەمەن 75 ساڵ كە بە ماددەی 3ی تیرۆر سزا دراوە، بە هۆكارێكی نادیار گیانی لەدەست دا و تەرمەكەی ڕەوانەی پزیشكیی سلێمانی كراوە.

 

تاوەكو ئێستا نازانرێت هۆكاری گیانلەدەستدانی ئەو زیندانییە بۆچی دەگەڕێتەوە، لەمبارەیەوە ئاڤا نیوز پەیوەندیی بە سەركەوت ئەحمەد، گوتەبێژی پۆلیسی سلێمانی كرد، بەڵام وەڵامی نەدایەوە.

لەلایەكی دیكەوە: ئەم ڕووداوەی ئەمڕۆ لەكاتێكدایە كە ڕۆژی سێشەممە 5-11-2024، دوو سزادراو لە دادگای سلێمانی ڕایان کرد، دوای ماوەیەکی کەم لەلایەن هێزە ئەمنییەکانەوە دەستگیرکرانەوە، زیندانییەکان ناویان جیهاد محەممەد و عادل محەممەدە و خەڵکی قەزای سەیدسادقن، دوو سزای لەسێدارەدان و 20 ساڵ سزای زیندانیکردنیان هەبووە.

 

گۆشەیەكی دیكە: هاوكات لە كۆتایی مانگی ڕابردوو، لە ڕۆژی 31-10-2024، لە زیندانی چاکسازیی گەورانی سلێمانی، زیندانییەکی خەڵکی کەلار بە ناوی (ک) و لەدایکبووی ساڵی 1997بە هاوکاری سێ برای و خەزووری برایەکی لە زیندان ڕایکرد، بەڵام تاوەكو ئێستا دەستگیر نەكراوەتەوە.

 

ئەمەش  بزانە: ئەم ڕووداوانەی سزادراوانی چاكسازیی گەورانی سلێمانی لە كاتێكدایە كە چەند مانگێك پێش ئێستاش، لە ڕۆژی 10-8-2024 زیندانییەك لە چاکسازی گەورانی سلێمانی، بە ناوی (غەزوان فەخری جابر) تەمەن 40 ساڵ بە نەتەوە عەرەب بە ھۆی جەڵتەی دڵەوە گیانی لەدەست دا، هەروەها لە لە ڕۆژی 31-8-2024، زیندانیكراوێكی تەمەن 34 ساڵ كە بە تاوانی كوشتنی بە ئەنقەست زیانی لەسێدارەدانی هەبوو، لەنێو زیندان كۆتایی بە ژیانی خۆی هێنا.