بانکی ناوەندیی عێراق و تورکیا لەسەر فراوانکردنی پەیوەندییە بانکییەکان ڕێککەوتن

ئاڤا نیوز

 

هەردوو پارێزگاری بانکی ناوەندی عێراق و تورکیا کۆبوونەوە و دەڵێن، ڕێکاری نوێی بانکی دەگرینەبەر بەمەبەستی ئاسانکاری بۆ عێراقییەکان تا بتوانن بە ئاسانترین شێوە پارەی کاڵا و کەلوپەکانیان لە تورکیا خەرج بکەن.

 

وێنە گەورەکە: عەلی عەلاق، پارێزگاری بانکی ناوەندیی عێراق لە ئیستەنبووڵ چاوی بە فاتح کارهان، پارێزگاری بانکی ناوەندیی تورکیا کەوت و هەردوولا باسیان لە دانانی ڕێکاری نوێ و ڕاستەوخۆ کرد بۆ مامەڵە بازرگانییەکانی نێوان هەردوو وڵات و ڕایانگەیاند، قۆناغێکی نوێ لە پەیوەندییە بانکییەکانی نێوانیان دەستپێدەکەن.

 

ڕاگەیێنراوی فەرمی: بانکی ناوەندی عێراق ڕایگەیاند: لەکۆبوونەوەکەدا پارێزگاری بانکی ناوەندیی عێراق داوایکرد لەبوارەکانی بەکارهێنانی کارتی بانکی عێراقی و کردنەوەی هەژمار بۆ بانکە عێراقییەکان لە تورکیا هەماهەنگی نێوان هەردوولا بەهێزتر بکرێت، ئەویش بە ئامانجی زیادکردنی ئەو ڕێگایانەی دەتوانرێت بەهۆیانەوە عێراقییەکان پارەی کەلوپەل و خزمەتگوزارییەکان لە تورکیا خەرج بکەن.

 

بەگوێرەی ڕاگەیێنراوی کۆبوونەوەکە، پارێزگاری بانکی ناوەندیی تورکیا پشتیوانی خۆی بۆ داواکارییەکەی بانکی ناوەندیی عێراق دەربڕیوە و ئامادەییشی بۆ هەموو ئاسانکارییەک نیشانداوە کە ببێتە هۆی ئاسانی مامەڵەی بازرگانی لەنێوان هەردوو وڵاتدا.

 

لەلایەکی دیکەوە: لە کۆبوونەوەیدا لەگەڵ ئەو بانکانەی تورکیا کە لقیان لە عێراق هەیە، عەلی عەلاق داوایکردووە بانکەکانی تورکیا بژاردە بازرگانییەکانیان زیاتر بکەن و لە بواری کەرتی بانکیدا زیاتر هاوکاری عێراق بن.