ئەمریکا پێشنیازێک بۆ ئاگربەست ڕادەستی حکومەتی لوبنان دەکات

ئاڤا نیوز

 

ویلایەتە یەکگرتووەکانی ئەمریکا، پێشنیازێکی پێشکەشی حکومەتی لوبنان کردووە دەربارەی ئاگربەستی نێوان حیزبوڵڵای لوبنان و ئیسرائیل، لە ئەگەری جێبەجێکردنی بۆ ماوەی دوو مانگ شەڕ ڕادەگیرێت.

 
لێدوانی فەرمی: بەرپرسێکی حکومەتی لوبنان بە ئاژانسی هەواڵی فرانس پرێسی ڕاگەیاندووە: لیزا جۆنسۆن، باڵیۆزی ئەمریکا لە لوبنان، پێشنیازێکی ئەمریکا لە 13 خاڵی ئاڕاستەی نەجیب میقاتی، سەرۆکوەزیرانی کاربەڕێکەری لوبنان و نەبیە بەڕی، سەرۆکی پەرلەمان کردووە، دەربارەی ئاگربەستی نێوان حیزبوڵڵا و ئیسرائیل.

 

زانیاریی زیاتر: بەرپرسەکە وردەکاریی تەواوی پێشنیازەکەی ئاشکرا نەکردووە، بەڵام لە حاڵەتی ڕێککەوتنی لایەنەکان، ئەوا ئەمریکا و فەرەنسا ئاگربەستەکە ڕادەگەیێنن، بۆ ماوەی 60 ڕۆژ دەبێت.

 

ئەوەی پێویستە بزانیت: لە ناوەڕاستی مانگی تشرینی یەکەمی ئەمساڵ ئیسرائیل جەنگی دژی حیزبوڵڵای لوبنان ڕاگەیاندووە، بەگوێرەی زانیارییەکانی وەزارەتی تەندروستی لوبنان تا ئێستا سێ هەزار و 440 هاووڵاتی لوبنانی گیانیان لەدەستداوە.

 

لەلایەکی دیکەوە: پێشتر جان بیار لاکارۆ، بریکاری ئەمینداری گشتیی نەتەوە یەکگرتووەکان، داوای لە بەرپرسانی ئیسرائیل کردووە، پشتیووانی لە ناوەندی بڕیارنامەی 1701بکەن.

 

ئەمەش بزانە: بڕیاری 1701ی نەتەوە یەکگرتووەکان بریتیە لەوەی، ئیسرائیل بە تەواوی لە لوبنان بکشێتەوە و هێزەکانی "یونیفێل"ی سەر بە نەتەوە یەکگرتووەکان لە شوێنیان بڵاوەیان پێ بکرێت و تەنیا سوپای لوبنان و هێزەکانی یونیفێل لەسەر سنووری بوونیان هەبێت.