لە سلێمانی دیداری "سوهرەوەرد تا شارەزوور" بەڕێوەدەچێت

ئاڤا نیوز 

دامەزراوەی کەریمی عەلەکە، دیدارێکی ڕێکخستووە بۆ دوو فەیلەسوفی کورد و چەندین توێژەری ناوخۆیی و هۆڵەندی و ئێرانی بەشدارییان لە دیدارەکە کردووە.

 

لێدوانی فەرمی: شاخەوان سدیق، بەڕێوەبەری دامەزراوەی کەریمی عەلەکە بە ئاڤا نیوزی ڕاگەیاند، دیدارەکە لە 15 توێژینەوە پێکدێت، ئەمڕۆ شەممە حەوت توێژینەوە پێشکەش دەکرێن و ئەوانی دیکە لە کتێبێک بڵاودەکرێنەوە و بەسەر ئامادەبووان دابەش دەکرێن، توێژینەوەکان نوێن و تایبەت بە دیدارەکە نووسراون، ماوەی 10 مانگە سەرقاڵی دیدارەکەین.

 

زانیاریی زیاتر: دیدارەکە بەناوی "سوهرەوەرد تا شارەزوور؛ ژیان و کەسایەتی دوو فەیلەسووفی ناوداری کورد، سوهرەوەردی و محەممەدی شارەزووری" دەبێت، ئەوانەی لە دیدارەکە توێژینەوە پێشکەش دەکەن ئەم توێژەرانەن، جووتیار نەریمان، هاوژین مەلا ئەمین، هۆشەنگ شێخ محەممەد، د.ئیدریس لاهووتی، میشیل لیزنبێرگ (هۆڵەندا)، ئیسماعیل شەمس (ئێران) و حەیدەر لەشکری.

 

ئەوەی پێویستە بیزانیت: سوهرەوەردی لە بنەڕەتدا ناوی تەواوی یەحیای کوڕی حەبەشی کوڕی ئەمیرەکە، نازناوی "شەهابەدین"ی هەڵگرتووە، لەنێوان ساڵانی 1150 بۆ 1155 لە شارۆچکەی سوهرەوەرد لەدایک بووە، خاوەنی فەلسەفەی ئیشراقە و خەڵکی شاری سوهرەوەردە لە ڕۆژهەڵاتی کوردستان، بەهۆی ناکۆکی تێڕوانین بۆ بابەتە فیقهیەکان، سەڵاحەددین ئەیوبی لەڕێگەی زاهیر شای کوڕیەوە دەیکوژێت.

 

لەلایەکی دیکەوە: محەممەد شارەزووری، ناوی تەواوی شەمسەددین محەممەد کوڕی مەحمود شارەزووری بووە، فەیلەسووف و مێژوونوسێکی کوردە و بە یەکەم کەس دادەنرێت کە توێژینەوەی لەبارەی حیکمەتەکانی سوهرەوەردی نووسیووە.