دەستەی دادوەریی هەڵبژاردن 38 تانە ڕەتدەکاتەوە

ئاڤا نیوز 

 

دەستەی دادوەریی هەڵبژاردنەکانی عێراق 38 تانە لەبارەی هەڵبژاردن بە ڕەتکردنەوە یەکلادەکاتەوە و تانانەشی ماون لە داهاتوودا یەکلاییان دەکاتەوە.

 

وێنە گەوەرەکە: دواى ڕاگەیاندنی ئەنجامی فەرمیی هەڵبژاردنی خولی شەشەمی پەرلەمانی کوردستان، 41 تانە لە ئەنجامی هەڵبژاردن لەلایەن لایەنە سیاسی و کاندیدەکانەوە پێشکەش بە کۆمیسیۆن کرابوون، کۆمیسیۆنیش تانەکانی ڕەوانەی دەستەی دادوەریی هەڵبژاردن کردبوو بۆ ئەوەی یەکلاییان بکاتەوە.

 

لێدوانی فەرمی: جومانە غەلای، گوتەبێژی کۆمیسیۆنی باڵای هەڵبژاردنەکانی عێراق بە ئاڤا نیوزی ڕایگەیاند: "دەستەی دادوەریی هەڵبژاردنەکانی عێراق 38 تانەی لەبارەی هەڵبژاردنی خولی شەشەمی پەرلەمانی کوردستان بە ڕەتکردنەوە یەکلاکردەوە".

 

زانیاریی زیاتر: بڕیارە لە ماوەی هەفتەی داهاتوودا ئەو تانانەی ماون ئەوانیش یەکلایی بکرێنەوە.
 
ئەوەی پێویستە بیزانیت: دوای یەکلاکردنەوەی سەرجەم تانەکان لەلایەن دەستەی دادوەریی هەڵبژاردنەوە، کۆمیسیۆن ئەنجامە فەرمییەکانی هەڵبژاردنی پەرلەمانی کوردستان پەسەند دەکات.