لەبارەی داخستنی فڕۆکەخانەکان لە ڕۆژانی سەرژمێرییدا ڕوونکردنەوە دەدرێت

ئاڤا نیوز

 

وەزارەتی گواستنەوەی عێراق دەڵێت، لە ڕۆژانی سەرژمێرییدا گەشتی فڕۆکەخانەکانی عێراق و هەرێمی کوردستان ئاسایی دەبێت و هەرکەسێک بلیتی گەشت و پاسپۆرتی پێبێت، لە خاڵەکانی پشکنیندا ئاسانکاریی بۆ دەکرێت بۆ ئەوەی بگاتە فڕۆکەخانەکان.

 

وێنە گەورەکە: بەهۆی ئەنجامدانی سەرژمێریی دانیشتوانەوە ڕۆژانی 20 و 21ی ئەم مانگە لە عێراق و هەرێمی کوردستان هاتووچۆی هاووڵاتیان سنووردار دەکرێت و تەنها دەتوانن لەناو شار، قەزا و ناحیە و ناوچەکانی سنووری نیشتەجێبوونی خۆیاندا بۆ کڕینی پێداویستییەکانیان هاتووچۆ بکەن.

 

لێدوانی فەرمی: مەیسام ئەلسافی، وتەبێژی وەزارەتی گواستنەوەی عێراق بە ئاژانسی فەرمی هەواڵی عێراقی ڕاگەیاند، لە ڕۆژانی قەدەغەی هاتووچۆدا بەهۆی سەرژمێرییەوە، گەشتی هەموو فڕۆکەخانەکانی وڵات ئاسایی دەبن.

 

ئەوەشی خستووەتەڕوو، لەگەڵ هێزە ئەمنییەکاندا هەماهەنگی کراوە بۆ ئەوەی ئاسانکاری بۆ گەشتیاران بکرێت، بەجۆرێک هەر گەشتیارێک بلیتی گەشت و پاسپۆرتی لابوو، لە خاڵەکانی پشکنیندا ڕێگەی پێدەدرێت بۆ ئەوەی بەرەو فڕۆکەخانە بڕوات.