لە سنووری کەرکووک بۆمبێکی چێنراو بە لیوایەکی هاوبەشدا تەقییەوە و قوربانی هەیە

ئاڤا نیوز

 

سەرلەبەیانی ئەمڕۆ بۆمبێکی چێنراو بە ئۆتۆمبێلی سەربازی لیوا هاوبەشەکان لەسنووری پارێزگای کەرکووک تەقییەوە، گوتەبێژی ئاسایشی پارتی لە کەرکووک دەڵیت: 'سێ کەس شەهید بوون و سێی دیکەش بریندار بوون'.

 

لێدوانی فەرمی: موقەدەم گۆڕان عەبدوڵڵا، گوتەبێژی ئاسایشی پارتی لە کەرکووک، بە ئاڤا نیوزی ڕاگەیاند: کاتژمێر 08:45 خولەکی سەرلەبەیانی، لە نزیک شارەدێی سلێمان بەگ سەر بە شارۆچکەی دووز خورماتوو، بۆمبێکی چێنراو بە ئۆتۆمبێلێکی سەربازی لە جۆری هەمەر تەقیوەتەوە، بەهۆیەوە سێ کەس شەهید بوون و سێی دیکەش بریندار بوون.

 

گوتەبێژی ئاسایشی پارتی لە کەرکووک گوتیشی؛ شەهیدەکان بریتین لە، عەقید سامان سابر سلێمان، فەرماندەی فەوجی سێی لیوای یەکی هاوبەش، عەقید محەممەد، شەریف ڕەزا شەهید بوون، بریندارەکانیش ناویان ئەحمەد شەهاب، مستەفا، شاکر جەواد بریندارن، لەنێو بریندارەکان عەرەب هەیە.

 

لایەکی دیکەوە: لیوا عەبدولخالق تەڵعەت، نوێنەری حکومەتی هەرێمی کوردستان لە فەرماندەیی هێزە هاوبەشەکانی عێراق بە ئاڤای ڕایگەیاند: تەقینەوەکە لە سێگۆشەی کفری، سلێمان بەگ و دووز خورماتوو ڕوویداوە، ئەو ئۆتۆمبێلەی پێدا تەقیوەتەوە ئۆتۆمبێلی فەوجی سێ لیوای دوو هاوبەشە.

 

زانیاریی زیاتر: تەرمی عەقید سامان بەرەو دووز خورماتوو بەڕێکراوە و خۆی لەبنەڕەتدا خەڵکی سەرگەڕانە.

 

ئەوەی پێویستە بیزانیت: ئەو شوێنەی تەقینەوەکەی تێدا ڕوویداوە نزیک بیرە نەوتەکانی پەڵکانەیە لە دووز خورماتوو، جموجوڵی داعش لەو ناوچەیە هەیە.