لە ڕۆژئاوای كوردستان تەقینەوەیەکی خۆکوژیی ڕوویدا و بریندار هەیە

ئاڤا نیوز

لە باشووری پارێزگای حەسەكە لە ڕۆژئاوای کوردستان، تەقینەوەیەکی خۆکوژیی ڕوویدا و بەگوێرەکی زانیارییەکان سێ ئەندامی هێزە ئەمنییەکان برینداربوون.

 

چیرۆکی سەرەکی: بەگوێرەی زانیارییەکان تەقینەوەکە لەڕێگەی ماتۆرسکیلێکەوە بووە، هاوکات باس لە هەوڵی ماتۆڕسوارێكی دیكە دەكەن بۆ تەقاندنەوەی ماتۆڕسكیلی دووەم، بەڵام بەر لە ئەنجامدانی كردە "تیرۆرستییەکە" هەڵهاتووە.

 

ڕاگەیێنراوی فەرمی: ئاسایشی بەڕێوەبەرایەتیی خۆسەر ڕایگەیاند، "لە كردەوەیەكی دوژمنكارانەی خۆکوژیدا، لەڕێگەی تەقاندنەوەی ماتۆڕسكیلێكی مینڕێژكراو لەسەر ڕێگەی سەرەكی نێوان حەسەكە - ڕەقە كە بە "ڕێگەی سپی" ناسراوە، تەقینەوەیەكی گەورە ڕوویداوە.

 

زانیاریی بەدەستهاتوو: ماتۆڕسكیلی دووەم هەوڵی تەقینەوەی داوە، بەڵام ماتۆڕسوارەكە بەرەو ناوچەی 'حوش باعر' هەڵاتووە و هێزە ئەمنییەكانیش بەردەوام بوون لە ڕاوەدوونانی.

 

ئەمەش بزانە: بەهۆی نیشتەجێبوونی كەسوكاری ئەندامانی پێشووی داعش لەنێو كەمپی هۆل لە پارێزگای حەسەكە، ئەو ناوچەیە بەردەوام لەژێر هەڕەشەی پاشماوەكانی تیرۆرستاندایە. ئاسایشی خۆسەریش دڵنیایی دەدات لەوەی هێزەکانیان بە هەموو پێداگرییەوە بەردەوامن لە بەدواداچوون بۆ سنوورداركردنی كردە تیرۆرستییەكان.