ئیسرائیل هەڕەشەی بە ئامانجگرتنی ژێرخانی عێراق و کوشتنی "کەسایەتییە دیارەکان" دەکات

ئاڤا نیوز

 

ئیسرائیل، ئێران تۆمەتبار دەکات بەوەی مووشەکی بالیستیکی بۆ عێراق گواستووەتەوە. هاوکات هەڕەشەی لێدان لە ژێرخانی ئابووری و کوشتنی ئەو کەسایەتییانە دەکات، کە وەک کەسانی "دیار" لە گرووپە عێراقییەکان ناوی بردوون.

 

وێنە گەورەکە: هێرشی گرووپە چەکدارەکانی عێراق لەژێر ناوی پشتیوانیی لە غەززە و لوبنان بۆ سەر پێگەکانی سوپای ئیسرائیل بەردەوامە و ڕۆژ بە ڕۆژیش هێرشەکانیان بۆسەر ئیسرائیل چڕتر دەکەنەوە. بە جۆرێک لە مانگی ئابدا کە شەش هێرشیان کردووە، بەڵام تشرینی یەکەم بۆ 90 هێرش بەرزبووەتەوە، لە سەرەتای ئەم مانگەشەوە زیاتر لە 65 هێرشی کردووە.

 

زانیاریی بەدەستهاتوو: بەپێی ڕاپۆرتێکی ڕۆژنامەی "مەعاریفی" ی ئیسرائیلی، ئێران مووشەکی بالیستیکی کورتمەودا بە قاچاخ بۆ عێراق دەنێرێت وەک بەشێک لە وەڵامی هێرشەکانی ئەم دواییەی ئیسرائیل.

 

زانیاریی زیاتر: بەگوێرەی ڕاپۆرتی ڕۆژنامە ئیسرائیلییەکە، ئەم مووشەکانە لەناو تانکەری ئاو یان نەوت شاردراونەتەوە، ئەمەش نیگەرانیی دروستکردووە لەوەی لە داهاتوودا بۆ سەر ئامانجەکانی ئیسرائیل و ئەمریکا بەکاربهێنرێت.

 

ئەوەی لەوبارەیەوە دەگوترێت: ئیسرائیل کار لەسەر پلانێک دەکات بۆ ڕووبەڕووبوونەوەی هەر هێرشێک لە عێراقەوە، سەرەتا بە ئامانجگرتنی ژێرخان و دامەزراوەکان و پاشان کوشتنی کەسایەتییە دیارەکانی میلیشیا ئێرانییەکان وەک ئەوەی پێشتر لە سووریا ئەنجامی داوە.

 

بەتەنیشت ئەم بابەتەوە: چوارشەممەی ڕابردوو شاندێکی ئەمریکی بە یاوەری ئەلینا ڕۆمانۆوسکی، باڵیۆزی ئەمریکا لە عێراق سەردانی بەغدایان کردووە و چاویان بە ژمارەیەک لە بەرپرسانی عێراق، لە نێویشیاندا محەممەد شیاع سوودانی، سەرۆکوەزیرانی عێراق کەوتووە. شاندەکەی ئەمریکا پەیامێکی هۆشداریی تووندیان وەک دوا دەرفەت داوەتە حکومەتی عێراق بۆ مامەڵەکردن لەگەڵ گرووپە شیعە چەکدارەکان کە بەردەوامن لە بە ئامانجگرتنی ئیسرائیل لە ڕێگەی هێرشە درۆنییەکانەوە بەناوی پاڵپشتی لە غەززە و لوبنان.