وەزیری پێشمەرگە داوای پشتیوانی زیاتری  ئەمریکا دەکات

ئاڤا نیوز

 

شۆڕش ئیسماعیل، وەزیری پێشمەرگەی حكومەتی هەرێمی كوردستان و ژمارەیەك ئەفسەری باڵای پێشمەرگە، لەگەڵ شاندێكی ئەنجوومەنی بازرگانیی ئەمریكا - كوردستان (USKBC) كۆبوونەوە.

 

ڕاگەیێنراوی فەرمی: وەزارەتی پێشمەرگە بڵاوی كردەوە: لە كۆبوونەوەكەدا وەزیری پێشمەرگە پیرۆزبایی سەرکەوتنی پرۆسەی هەڵبژاردنەکانی ئەمریکای لە شاندەكە كرد و ڕایگەیاند: هیواخوازین کابینەی نوێی حکومەتی ئەمریکا پاڵپشتی و پشتیوانییەکانی بۆ گەلی کوردستان و وەزارەتی پێشمەرگە زیاتربێت.

 

وەزیری پێشمەرگە ڕاشیگەیاند: هێزی پێشمەرگەی کوردستان بەو پەڕی توانا و گیانفیداییەوە بەردەوامە لە پارێزگاریکردنی ئارامی و سەقامگیری هەرێمی کوردستان و عێراق و ناوچەکەش، لەم پێناوەشدا کاروانی قوربانیدان و شەهیدانمان بەردەوامە.

 

لەلایەكی دیكەوە: دەیڤد تافوری، سەرۆکی ئەنجوومەنی بازرگانی ئەمریکا - کوردستان، لەبارەی ئامانجی سەردانەکەیان ڕایگەیاند: بە پێویستی دەزانین وەکو ئەم ئەنجوومەنە باڵایە پشتیوانیی و پاڵپشتیی بەردەوامی خۆمان بۆ گیانفیدایی و قارەمانێتی و ڕۆڵی باڵای پێشمەرگە دەرببڕین.

 

ئەوەش بزانە: هەر لە كۆبوونەوەكەدا تاووتوێی چەند بابەتێکی گرنگ و پەیوەست بە خزمەتکردنی زیاتری هێزی پێشمەرگەی کوردستان کرا.