گرانترین خواردن لە جیهاندا لە هەولێر دروست دەکرێت

ئاڤا نیوز

 

گرانترین خواردن لە جیهاندا لە هەولێر دروست دەکرێت، ناوی کوردستانە و لەسەر قاپ و کەوچکی زێڕ و ئەڵماس پێشکەش دەکرێت، نرخی یەک ژەمی هەشت دەفتەر و 70 وەرەقەیە، کە دەکات 130 ملیۆن و 500 هەزار دینار.

 

وێنە گەورەکە: ئامادەکاری بۆ دروستکردنی گرانترین خواردن لەسەر ئاستی جیهان لە هەرێمی کوردستان دەکرێت، سەرجەم قاپ، کەوچک و ئەو فنجانانەی خواردنەکەیان تێیدا پێشکەش دەکرێت، لە زێڕ و ئەڵماس و زیو دروست کراون، گەیشتن بەم ژەمە خواردنەش پێویستی بە پێشکەشکردنی سیڤی و بەڵگەنامە هەیە.

 

لێدوانی فەرمی: چێشتخانەی ئەلەند ستێکهاوس خواردنەکە دروست دەکات، محەممەد فەلاح، بەڕێوەبەری خواردنگەکە بە ئاڤا نیوزی ڕاگەیاند: هەر کەسێک خواردنەکە بخوات پێویستە چەند خاڵێک ڕەچاو بکات، لەوانە پێشتر بە سیڤی داوای خواردنەکەی کردبێت و بەڵگەنامەی ئەوەشی پێشکەش کردبێت کە پێشتر هیچ تاوانێکی نەکردووە.

 

زانیاریی زیاتر: لەگەڵ خواردنەکە، نێرگەلەیەک پێشکەشی کەسەکە دەکرێت کە بەهاکەی زیاتر لە یەک ملیۆن دۆلارە، هاوکات گرانترین قاوەی جیهانیش پێشکەش دەکرێت.

 

ژمارەکان وادەڵێن: بەڕێوەبەری چێشتخانەکە ڕیزبەندی گرانترین خواردنەکان بۆ ئاڤا نیوز ئاشکرا دەکات، لە نێویاندا خواردنی کوردستان گرانگترین نرخی هەیە.

ڕێزبەندی خواردنەکان: 

یەکەم: خواردنی کوردستان، 87 هەزار دۆلار کە دەکاتە هەشت دەفتەر و 70 وەرەقە.

 دووەم: گراند فیلاس لە مەکسیک، 25 هەزار دۆلار کە دەکاتە دوو دەفتەر و 50 وەرەقە. 

سێیەم: پیتزا لویس لە ئیتاڵیا، 12 هەزار دۆلار کە دەکاتە یەک دەفتەر و 20 وەرەقە.

چوارەم: کافیاری ئەڵماس لە ئیمارات، نۆ هەزار و 844 دۆلار کە دەکاتە 98 وەرەقە و 44 سەنت.