سەرژمێریی دانیشتووان لە دەرەوەی عێراق ناکرێت

ئاڤا نیوز

 

ماوەی سێ ڕۆژە پرۆسەی سەرژمێری لە هەرێمی کوردسان و عێراق دەستیپێکردووە و بریکاری وەزارەتی پلاندان دەڵیت: ئەوانەی لە دەرەوەی وڵات دەژین، بەشێک نابن لەو سەرژمێرییە.

 

وینە گەرەکە: پرۆسەی سەرژمێری لە هەرێمی کوردستان و عێراق بەردەوامە، هاوکات ئەو کەسانە سەرژمێریی ناکرێن کە لە دەرەوەی وڵات دەژین، لەلایەکی دیکەوە ئەوانەی بە مەبەستی گەشتکردن چوونەتە دەرەوەی وڵات، دەتوانرێت تۆمار بکرێن.

 

لێدوانی فەرمی: سیروان محەممەد، بریکاری وەزارەتی پلاندانانی حکومەتی هەرێمی کوردستان بە ئاڤا نیوزی ڕاگەیاند: سەرژمێریی بۆ ئەو ئەوانە ناکرێت کە لە دەرەوەی وڵات دەژین و ناگەڕێنەوە، چونکە سەرژمێریی تەنیا لە چوارچێوەی سنووری عێراق ئەنجام دەدەرێت، هاوکات ئەگەر کەسێکی خێزانەکە لێرە بێت و ئەوانی دیکە لە دەرەوەی وڵات بن، ئەوا دەتوانێت داوا لە بژمێرەکە بکات لەڕێگەی کارتی نیشتمانیانەوە یان کۆپیەکی کارتەکە، تۆمار بکرێن.

 

ئەمەش بزانە: بریکاری وەزارەتی پلاندانانی حکومەتی هەرێمی کوردستان ئاماژە بە گرنگیی سەرژمێری دەکات و دەڵێت: 77 پرسیار لە هەر خێزانێک دەکرێن و گرنگی ئەو پرسیارانەش لەوە دایە کە یەکەمجارە حکومەتی هەرێمی کوردستان لە سەرژمێریدا بەشدار دەبێت، پرسیارەکان سەیرن نین و بەپیی ستانداردی جیهانی دانراون، پرسیارەکان باسی باری کەسی، خویندن، تەندروستی، کارکردن و کەلوپەلەکانی ماڵەوە دەکات، ئەمەش بۆ تێگەیشتنە لە بارودۆخی هەرێمی کوردستان و عیراق.

 

ئەوەی پێویستە بیزانیت: لە سەرژمێریدا 18 جۆر كەلوپەل لەنێو ماڵان دیاریکراون کە پرسیاریان لەبارەوە بکرێت، ئەوانیش بریتین لە: ئۆتۆمبێل، ماتۆرسکیل، سەلاجە، موجەمیدە، مایکرۆ، موبەڕیدە، جلشۆر، قاپشۆر، سپلێت، مۆلیدەی کارەبایی، تەلەڤزیۆن، بۆیلەر، گسكی كارەبایی، كۆمپیوتەر، مۆبایلی زیرەك، ئایپاد، ئینتەرنێت و کەلوپەلی دیکە.