هەر کەسێک قەدەغەی هاتووچۆ بشکێنێت دەدرێتە دادگە

ئاڤا نیوز 

 

بۆ ئەوەی پرۆسەی سەرژمێری بە ڕێكوپێكی و بێ گرفت بەڕێوەبچێت، دوای كاتژمێری 12ی ئەمشەو كە دەكاتە بەرەبەیانی ڕۆژی 20 مانگ، قەدەغەی هاتووچۆ لە سەرتاسەری هەرێمی كوردستان دەستپێدەكات و جوڵەی ئۆتۆمبێل و هاونیشتمانیان سنووردار دەبێت و تاوەكو کاتژمێر (12:00)ی شەوی 21 لەسەر 22ی11 بەردەوام دەبێت.

 

وێنە گەورەکە: پرۆسەی سەرژمێری گشتی لە هەرێمی كوردستان و عێراق دەستیپێکردووە، تیمەكانی ئامار و سەرژمێری لە 20 و 21ـی مانگ سەردانی ماڵان دەكەن و فۆرمێكی تایبەت پڕدەكەنەوە کە چەندین پرسیاری جۆراوجۆر لەخۆدەگرێت، یەکەمجاریشە لە عێراق و هەرێمی کوردستان سەرژمێری دانیشتووان بەشێوەی ئۆنڵاین و تەکنەلۆژیای پێشکەوتووەوە دەکرێت.

 

لەم دووڕۆژەش  زۆرینەی بازاڕ و شوێنە گشتییەكانیش دادەخرێت، ئەمە بۆ ئەوەیە كە ئەم دوو ڕۆژە هەمووان بۆخۆیان لەماڵەكانی خۆیان دابنیشن و چاوەڕوانی بژمێرەكان بكەن بۆ ئەوەی لە تەقەی دەرگا بدا و دەست بە پرسیاركردن بكات لێیان.

 

لێدوانی فەرمی: ماجد سەیدساڵح، جێگری پارێزگاری دهۆک ڕایگەیاند، بەشێك لەوانەی حەزیان لە یاساشكێنییە دەڵێن بە ئارەزووی خۆمان بە ئۆتۆمبێل دەگەڕێین و هیچ سزایەك نادرێین، ئەم قەدەغەیە تەنیا قسەیە، بەڵام ڕاستییەكە ئەوەیە كە  لەو دوو ڕۆژە چەندین خاڵی پشكنین لە شار و شارۆچكەكان دادەنرێن، هەر کەسێک سەرپێچی بکات و پابەندی ڕیککارەکان نەبێت، بەپێی یاسا دەدرێتە دادگە و سزای دارایی دەدرێت.

 

لەلایەکی دیکەوە: ئەم بڕیارە ئێشكگری فەرمانگەكان و هێزە ئەمنییەكان و ڕاگەیاندنکاران و ئەو كەسانە ناگرێتەوە كە پرۆسەی سەرژمێرییەكە ئەنجام دەدەن.

 

لایەنە ئەرێنییەکان: ئەم دوو ڕۆژە كەش و دۆخی شەقام و كۆڵانەكان ئەگەرچی وەك هی سەردەمی كۆڕۆناش نەبێت نزیك دەبێت لەو، شار خامۆش دەبێت و تاك تاكە ئۆتۆمبێل دەبینین کە ئەمەش دەبێتە هۆی پاکبوونەوەی ئاسمان لە دووکەڵی پیسی کارگە و ئۆتۆمبێلەکان، بەپێچەوانەوە كۆڵانەكان قەرەباڵغ دەبن و پڕ دەبن لە بژمێرەكان و خەڵكی گەڕەك.

 

ئەوەش بزانە: هەلی تۆماركردن ناو و زانیاریی بۆ هەر خێزانێك تاوەكو كاتژمێر 12ی شەوی 21ی مانگە دوای ئەوە فۆرمى تۆمارى خێزان داده‌خرێت وهيچ خێزان و ناوێكی دیكە تۆمار ناكرێت.