لە هەرێمی کوردستان 92٪ی خەڵک سەرژمێر کراون

ئاڤا نیوز

 

تاوەکو کاتژمێر شەشی ئێوارە 92٪ی خەڵک واتە شەش ملیۆن کەس لە هەرێمی کوردستان سەرژمێر کراون، لە عێراقیش ڕێژەکە گەیشتووەتە 80% و نزیکەی 32 ملیۆن کەس سەرژمێر کراون.

 

وێنە گەورەکە: کاتژمێر 07:00ی بەیانی ئەمڕۆ قۆناغی دووەمی سەرژمێریی دانیشتووان لە سەرجەم ناوچەکانی هەرێمی کوردستان و عێراق دەستیپێکرد و تاوەکو کاتژمێر 12:00ی سبەی شەو بەردەوام دەبێت.

 

لێدوانی فەرمی: سیروان محەممەد، سەرۆکی ژووری ئۆپەراسیۆنی پرۆسەی سەرژمێری لە هەرێمی کوردستان بە ئاڤای ڕاگەیاند:  "لە هەرێمی کوردستان تاوەکو کاتژمێر شەشی ئێوارە  92٪ـی خەڵک واتە شەش ملیۆن کەس سەرژمێر کراون.  پرۆسەکەش ئەمشەو تاوەکو کاتژمێر 12 و سبەش بەهەمانشێوە بەردەوام دەبێت."

 

لەلایەکی دیکەوە: ئاڤا زانیویەتی لە عێراق نزیکەی  82٪ی خەڵک واتە نزیکەی 32 ملیۆن کەس سەرژمێر کراون. لەسەر ئاستی کوردستان و عێراقیش لە ناحیەی ئەلقووشی سەر بە پارێزگای نەینەوا کە دەکەوێتە سنووری ماددەی 140، قۆناغی دووەمی سەرژمێری 100% تەواو کراوە.

 

کێشە و گرفتەکان: سیروان محەممەد باسی کێشە و گرفتەکانی پرۆسەی سەرژمێری کرد و گوتی، هەندێ کێشە و گرفتی تەکنیکی ڕوویان داوە، لە هەندێک شوێن ئایپادەکان کاریان نەکردووە، لە هەندێ شوێن سیستەمەکە کێشەی هەبووە، کێشەکانیش بەردەوام ڕوودەدەن و بەخێرایی چارەسەر دەکرێن، هۆکارەکەی بەهۆی زۆری فشارە لەسەر سیستەمەکە. نموونەیەکیشی هێنایەوە کە کاتژمێر 04:00ی ئەمڕۆ لە یەک کاتدا لە هەموو عێراق کێشەی تەکنیکی دروست بووە و دواتر چارەسەر کراوە.

 

خاڵی ئەرێنی: سیروان محەممەد، دڵنیایی دا لەوەی کە هیچ مەترسییەک لەسەر سڕینەوەی داتاکان دروست نەبووە و هیچ داتایەک نەسڕاوەتەوە، تەنانەت سیستەمەکە ڕێگە بە سڕینەوەی داتا نادات و ئەگەر بژمێرێک بیەوێت داتایەک بیسڕێتەوە ناتوانێت.

 

ئەمەش بزانە: لە هەرێمی کوردستان نزیکەی 26 هەزار بژمێر و سەرپەرشتیار سەرقاڵی سەرژمێرین، ئەو شوێن و ماڵانەی ئەمڕۆ سەردانیان نەکراوە ئەمشەو یان سبەی سەردانیان دەکرێت و هیچ خێزانێک نامێنێت سەرژمێر نەکرێت، دوای 48 تا 72 کاتژمێریش لە تەواوبوونی پرۆسەکە ئەنجامەکەی ڕادەگەیێنرێت.