شاخەوان عەبدوڵڵا: ئەمە دوایین سەرژمێرییە و لەمەودوا دەکرێتە ئەلیکترۆنی

ئاڤا نیوز

 

جێگری سەرۆكی پەرلەمانی عێراق ڕایدەگەیێنێ، لە كەركووك پرۆسەكە بە باشی بەڕێوەدەچێت و هیچ گرفتێك نەبووە، تەنیا لە سنووری خانەقین ڕێگری و كێشەی سیاسیی هەبووە.

 

لێدوانی فەرمی: شاخەوان عەبدوڵڵا، جێگری سەرۆكی پەرلەمانی عێراق کە خۆی خەڵکی کەرکووکە،  لە گەشتی هەواڵەکانی کاتژمێر 07:00ـی ئاڤا ڕاگەیاند: "خەڵكی كەركووك لە شێوەی كەرنەڤاڵێك پێشوازییان لە پرۆسەكەی سەرژمێری كردووە و گەڕاونەتەوە ناوچەكە، بە گشتی پرۆسەكە لە كەركووك و ناوچە كوردستانییەكان بە باشی بەڕێوەدەچێت، تەنیا لە چەند گوندێكی سنووری خانەقین ڕێگری هەبووە و كێشەكە سیاسی بووە."

 

لەلایەكی دیكەوە: لەبارەی ئەگەری ڕێگریکردن شاخەوان عەبدوڵڵا گوتی، "لە هیچ شوێنێك لەلایەن سوپای عێراقەوە ڕێگری نەكراوە و تا ڕادەیەكی باشیش هاوكاری تیمەكان بوون، هەروەها ئەمە دوایین سەرژمێری دەبێت لە عێراق، لەمەودوا سەرژمێری دەبێتە ئەلیكترۆنی و بەردەوام گۆڕانكارییەكان تۆمار دەكرێن".

 

ئەوەی پێویستە بیزانیت: سەبارەت بە نیگەرانییەكانی كورد لەمەڕ پرۆسەی سەرژمێری جێگری سەرۆكی پەرلەمانی عێراق جەختی كردەوە، كورد هیچ نیگەرانییەکی سەبارەت بە سەرژمێری نەماوە و حكومەتی عێراق تێبینیی هەرێمی كوردستانی سەبارەت بە پرۆسەكە لەبەرچاو گرت.