لە ئەلقووش وەک یەکەم ناوچە لە کوردستان و عێراق سەرژمێری تەواو بوو

ئاڤا نیوز

 

لە ئەلقووش لە سنووری ماددەی 140 وەک یەکەمین ناحیە لەسەر ئاستی عێراق و هەرێمی کوردستان،  قۆناغی دووەمی سەرژمێری گشتیی دانیشتووان تەواو بوو.

 

وێنە گەورەکە: کاتژمێر 07:00ی بەیانی ئەمڕۆ قۆناغی دووەمی سەرژمێریی دانیشتووان لە سەرجەم ناوچەکانی هەرێمی کوردستان و عێراق دەستیپێکرد و تاوەکو کاتژمێر 12:00ی سبەی شەو بەردەوام دەبێت.

 

لێدوانی فەرمی: لارا یوسف، بەڕێوەبەری ناحیەی ئەلقووش بە ئاڤا میدیای ڕاگەیاند: قۆناغی دووەمی پرۆسەی سەرژمێریمان لە سەنتەری ناحیەکە و تەواوی گوندەکانی سنوورەکە تەواو کرد، کە وردبینیکردن بوو لە تۆماری خێزانەکان و ژمارەی ئەندامانی هەر خێزانێک.

 

زانیاریی زیاتر: لەبارەی ئامادەکارییەکان بۆ قۆناغی دووەمی سەرژمێری بەڕێوەبەری ناحیەی ئەلقووش دەڵێت: کارمەندانی سەرژمێری خۆیان بۆ قۆناغی سێیەمی پرۆسەی سەرژمێری ئامادە دەکەن کە وردەکاری زیاتری تێدایە، هاوکات بەپێی ئامارەکان، ئەلقووش لە 11 هەزار خێزان پێکدێت.

 

ئەمەش بزانە: لە کوردستان و عێراق پرۆسەی سەرژمێریی دانیشتووان بەردەوامە و تاوەکو ئێستا لە هەرێمی کوردستان 92٪ی دانیشتووان و لە عێراقیش 82٪ تۆمارکراون.