بەهۆی شەڕی پەکەکە و تورکیا لە 30 گوندی سیدەکان سەرژمێری نەکرا

ئاڤا نیوز

 

بەهۆی ناسەقامگیری دۆخی ئەمنی ناوچە سنوورییەكانی دەڤەری سیدەكان و برادۆست، پرۆسەی سەرژمێریی گشتی لە 30 گوندی ئەو دەڤەرە ئەنجام نەدرا، بۆ چارەسەركردنی ئەو گرفتەش گوندنشینان ڕوویان لە سەنتەری شارۆچكەی سیدەكان كردووە و لەلایەن تیمەكانەوە پرۆسەكەیان بۆ كراوە و پاشان گەڕاونەتەوە.

 

وێنە گەورەكە:   ڕۆژی چوارشەممە قۆناغی دووەمی سەرژمێری هاوشێوەی شار و شارۆچكە و ناوچەكانی دیكەی هەرێمی كوردستان و پارێزگاكانی عێراق، لە دەڤەری سیدەكان پرۆسەی سەرژمێریی گشتیی دانیشتووان بەردەوامە. بژمێرەكان لە سەنتەری شارۆچكەكە و ناوچەكانی دەوروبەری، بەبێ هیچ گرفتێك كارەكانیان ئەنجامدەدا و پرۆسەكە بەئاسایی بەڕێوەدەچوو. بەڵام بەهۆی بەردەوامی شەڕو ناكۆكییەكانی نێوان سوپای توركیا و چەكدارانی پەكەكە، لە 30 گوندی دەڤەری سیدەكان، كارمەندانی بژمێر نەیانتوانیوە بچنە ئەو گوندانە.

لێدوانی فەرمی: هەژار بەهرام، بەڕێوەبەری ئاماری سۆران تایبەت بە ئاڤا نیوز ڕایگەیاند، بۆ چارەسەركردنی ئەوگرفتە، لەڕێگەی موختاری ئەو گوندانەوە داوا لە گوندنشینانی ئەو دەڤەرە كراوە بێنە سەنتەری شارۆچكەی سیدەكان و دوای وەرگرتنی زانیاریی پێویست لەو هاووڵاتیانە، گەڕاونەتەوە شوێنی خۆیان. 

هۆکارە زانراوەکان: بەهۆی هەبوونی ڕادار و چاودێریكردنی بەردەوامی ناوچە سنوورییەكانی دەڤەری سیدەكان لەلایەن سوپای توركیا و چەكدارانی پەكەكەوە لەلایەك و، نەبوونی هێڵەكانی ئینتەرنێت لەو ناوچانە لەلایەکی دیکە، تیمەكانی بژمێر ناتوانن ئامێری "جی پی ئێس"ـی نێو تابلێتەكان بۆ كۆكردنەوەی داتا و زانیاری بەكاربهێنن، ئەوەش گرفت بۆ كارەكانیان دروست دەكات.