لە گوندێکی شێخان لە کۆی نزیکەی 1000 خێزان تەنیا یەک بژمێری بۆ دانراوە

ئاڤا نیوز 

 

دووەم ڕۆژی سەرژمێری لە هەرێمی کوردستان و عێراق  بەردەوامە و لە هەندێک ناوچەی دەرەوەی ئیدارەی هەرێمی کوردستانیش کێشەی تابلێت، یوزەرنەیم و کەمی بژمێر هەیە و چارەسەر نەکراوە.

وێنە گەورەکە: کاتژمێر 07:00ـی بەیانی ڕۆژی چوارشەممە 21-11-2024 قۆناغی دووەمی سەرژمێریی دانیشتووان لە سەرجەم ناوچەکانی هەرێمی کوردستان و عێراق بۆ دووەم ڕۆژ دەستیپێکردەوە و تاوەکو کاتژمێر 12:00ـی ئەمشەو بەردەوام دەبێت.

زانیاریی پەیامنێر: زەید تەها، پەیامنێری ئاڤا ڕایگەیاند: لە گوندی گلەشینی سەر بە ناحیەی زێلکانی سەر بە قەزای شێخان کە سەرجەم دانیشتووانەکەی کوردن و ژمارەیان نزیکەی 1000 خێزان دەبێت، تەنیا یەک بژمێریان بۆ دانراوە، بەهۆیەوە تاوەکو کاتژمێر 06:00ـی ئێوارەی دوێنێ، نزیکەی 25 خێزان لە پڕۆسەی سەرژمێریدا تۆمارکراون.

 

لەلایەکی دیکەوە: شێروان دووبەردانی، ئەندامی پەرلەمانی عێراق سەبارەت بەو گرفتەی گوندی گلەشین بە ئاڤا نیوزی ڕاگەیاند: حکومەتی عێراق بە مەبەست، تەنیا یەک بژمێریان بۆ گوندەکە داناوە و  بۆ ئەوەیە دیموگرافیای گوندەکە لە کوردنشینەوە بۆ عەرەبنشین بگۆڕدرێت.

 

ئەمەش بزانە: دانیشتووانیی گوندی گلەشین، بەهۆی کێشەی دانانی یەک بژمێر لە ناوچەکەیان و کەمی تۆمارکردنیان لە پڕۆسەی سەرژمێریدا خۆپێشاندانیان کرد و ڕایانگەیاند، ئەوەی بەرامبەریان دەکرێت بە مەبەستە و ئەگەر سەرجەم گوندنشینان تۆمار نەکرێن، ئەنجامی پڕۆسەکە ڕەتدەکەنەوە و قبووڵی ناکەن.