ئەمریکا پێداویستییە سەربازییەکانی لە عێراقەوە دەگوازێتەوە سووریا

 

ئاڤا نیوز

 

سوپای ئەمریکا لەماوەی دوو ڕۆژی ڕابردوودا پردێکی ئاسمانی لە نێوان بنکە سەربازییەکانی لە عێراق و سووریا کردووەتەوە، لە ماوەی ئەو دوو ڕۆژەدا چەندین پێداویستی سەربازیی و لۆجیستی لە عێراقەوە گواستووەتەوە بۆ بنکەکانی لە سووریا.

 

زانیاریی بەدەستهاتوو: بەپێی زانیاریی ئاژانسەکانی هەواڵیی ڕووسیا لە سەرچاوە خۆجێیەکانی سووریاوە ئەوەی ئاشکرا کردووە کە فڕۆکەیەکی بارهەڵگری ئەمریکی ڕۆژی چوارشەممە 20-11-2024، لە یەکێک لە بنکە سەربازییەکانی ئەمریکا لە نزیک بەنداوی حەسەکە نیشتووەتەوە کە پێداویستیی سەربازی و لۆجستیکی بارکردبوو.

 

لەلایەکی دیکە: ڕوانگەی سووری بۆ مافەکانی مرۆڤ ڕایگەیاند: هێزەکانی هاوپەیمانیی نێودەوڵەتی بە بەشداریی هێزەکانی سووریای دیموکرات مانۆڕی سەربازی چڕوپڕیان لە بنکە سەربازییەکەیان لە شارۆچکەی حەسەکە کردووە، مانۆڕەکان بریتی بوونە لە بەکارهێنانی تۆپخانە و فڕۆکەی جەنگی و چەکی دژەفڕۆکە.

 

زانیاریی زیاتر: بەگوێرەی ڕوانگەی سووری مانۆڕەکە هاوکات بووە لەگەڵ نیشتنەوەی فڕۆکەیەکی بارهەڵگری هێزەکانی ئەمریکا لە هەمان بنکەدا کە پێداویستی سەربازی و لۆجستیکی تێدابوو، ئەمەش بە ئامانجی بەهێزکردنی توانای بەرگریی هێزەکان و بەرزکردنەوەی ئامادەیی شەڕکردنیان بۆ ڕووبەڕووبوونەوەی هەڕەشەکانی ئێران و میلیشیاکانی لە ناوچەکەدا.

 

ئەوەی پێویستە بیزانیت: دوو ڕۆژ پێشتر فڕۆکەیەکی بارهەڵگری دیکە لە عێراقەوە چووە بۆ بنکەی سەربازی خەراب جیر لە دەوربەری ڕمێلان لە باکووری حەسەکە، بە هەمان شێوە پێداویستی سەربازی و لۆجیستی بۆ بنکەکە گواستووەتەوە. ئەمەش گوزارشت لە زیادبوونی ئامادە سەربازییەکانی ئەمریکا دێت لە باکووری ڕۆژهەڵاتی سووریا. وەک ڕوانگەی سووری باسی لێوەدەکات.