هێڵی گەرم بۆ خێزانانە تۆمارنەکراوەکان لە سەرژمێری کارا کرا

ئاڤا نیوز 

 

ئەمڕۆ دووەمین ڕۆژی بەڕێوەچوونی قۆناغی دووەمی سەرژمێریی گشتییە لە عێراق و هەرێمی كوردستان بەشێکی زۆری خێزانەكان تۆمارکراون، بەڵام دەیان خێزانیش هەن كە هێشتا تیمەكان سەردانیان نەكردوون.

 

زانیاریی بەدەستهاتوو: لە هەرێمی کوردستان هێشتا ژمارەیەک گەڕەک و کۆڵان هەن تیمەکانی سەرژمێری سەردانیان نەکردوون، بەپێی زانیارییە بەدەستهاتووەکان چەند گەڕەكێكی شاری هەولێر، بەتایبەت لە گەڕەكەكانی دەوروبەری قەڵای هەولێر و نزیک بازاڕ و چەند كۆڵانێک لە گەڕەكی هەڤاڵان ژمارەیەک خێزان تاوەکو ئێستا بژمێرەکان نەچوونەتە لایان و لە سەرژمێریی گشتیدا تۆمارنەکراون و چاوەڕێی تیمەکن دەکەن بچنە لایان و وەک دانیشتووانی شارەکە تۆماریان بکەن.

 

لێدوانی فەرمی: سەرچاوەیەک لە بەڕێوەبەرایەتیی گشتیی ئاماری هەرێمی كوردستان بە ئاڤا میدیای ڕاگەیاند، هێڵێکی گەرم بە ژمارە 567 تایبەت بۆ ئەو خێزانانە خراوەتە كار كە تاوەكو ئێستا تیمەکان نەگەیشتوونەتە لایان و تۆمارنەكراون یان گرفتێكیان هەیە، دەتوانن پەیوەندی بەو ژمارەیەوە بكەن و تیمەكان ئاگاداربكەنەوە بۆ ئەوەی بەزووترین كات كێشەكەیان چارەسەر بكرێت.

 

لەلایەكی دیكەوە: بەپێی گوتەی سەرچاوەكە، ژمارەیەک خێزان تاوەكو ئێستا تۆمارنەكراون و دەبێت تاوەكو كاتژمێر 12:00ـی ئەمشەو کە دوایین وادەیە لە سەرژمێریی گشتیدا تۆمار بکرێن، گوتیشی: هۆکاری تۆمارنەکردنی ئەو خێزانانە ئەوەیە هەندێک شوێن و كۆڵان و گەڕەک هەن لەسەر نەخشە كەمێک ئاڵۆزن و ون دەبن، بۆیە دەبێت خێزانەكان خۆیان پەیوەندیی بكەن و تیمەكان ئاگاداربكەنەوە.