تەقەكەرەكانی دوێنێ شەوی هەولێر دەستگیر كران

ئاڤا نیوز 

 

بەڕێوەبەرایەتیی پۆلیسی پارێزگای هەولێر، دەستگیركردنی دوو تۆمەتباری ڕاگەیاند كە شەوی ڕابردوو لە شەقامی 60 مەتریی شاری هەولێر بە هەڕەمەكی تەقەیان كردووە.

 

ڕاگەیێنراوی فەرمی: پۆلیسی هەولێر ڕایگەیاند: دوو تۆمەتبار بە ناوەکانی (ز. ح. و) و (ع. س. م) دەستگیر كران كە شەوی ڕابردوو ڕێکەوتی 20-11-2024 بەشێوەیەکی هەڕەمەکی لەنێو شاری هەولێر لەسەر شەقامی 60 مەتری تەقەیان کردبوو.

 

لەلایەكی دیكەوە: پۆلیسی هەولێر ئاماژەی بەوە داوە كە دوای لێکۆڵینەوە و بەدواداچوونی تیمەکانی بەڕێوەبەرایەتیی پۆلیسی پارێزگای هەولێر، دەرکەوتووە کە ئەو دوو تۆمەتبارە لەناو ئۆتۆمبێلێكی جۆری (تاکسی) بە شێوەیەکی هەڕەمەکی و نابەرپرسیارانە لەسەر شەقامی 60 مەتری تەقەیان کردووە و گوللەیەک بەر پەنجەرەی یەکێک لە تاوەرەکانی نیشتەجێبوون کەوتووە، بۆیە پاش وەرگرتنی ڕەزامەندیی دادوەری لێکۆڵینەوە، تۆمەتبارەكان دەستگیر کران و پەڕاوی لێکۆڵینەوەیان بۆ کرایەوە و درانە دادگا.

 

زانیاریی زیاتر: پۆلیسی هەولێر جەخت دەکاتەوە کە هەر کەسێک لە شاری هەولێر بیەوێت ئارامیی شار تێکبدات و ئاژاوە بنێتەوە، دەدرێتە دادگا.