ئاڤا ژمارەی دانیشتووانی هەرێمی کوردستان و گەڕەک و گوندەکان ئاشکرا دەکات

ئاڤا نیوز

 

دوای نزیکەی هەفتەیەک لە دەستپێکردنی پرۆسەی سەرژمێری و دوو ڕۆژ قەدەغەی هاتووچۆ، دەردەکەوێت هەرێمی کوردستان خاوەنی حەوت ملیۆن دانیشتووان و پێنج هەزار و 553گوندە.

 

وێنە گەورەکە: دواین سەرژمێریی گشتی لە عێراق ساڵی 1987 بووە، لەو کاتەوە یەکە کارگێڕییەکان لە عێراق و هەرێمی کوردستان گۆڕانکاریی زۆریان لێ بەسەر هاتووە و ژمارەی قەزا و ناحیە و گوندەکان زیادیان کردووە.

 

لێدوانی فەرمی: مەحموود عوسمان، بەڕێوەبەری جێبەجێکاری سەرژمێری لە هەرێمی کوردستان بە ئاڤا میدیای راگەیاند: تاوەکو ئێستا رێژەی 99%ی پرۆسەی سەرژمێریی تەواو بووە، وا دەخەمڵێنرێت ژمارەی دانیشتووانی هەرێمی کوردستان حەوت ملیۆن کەس بێت، لەو ژمارەیە شەش ملیۆن و 500 هەزار کەسی خەڵکی هەرێمی کوردستانن و 500 هەزار کەسیش  ئاوارە و خەڵکی بیانین.

هەرێمی کوردستان پێکدێت لە:
چوار پارێزگا - چوار ئیدارەى سەربەخۆ، 42 قەزا، 154 ناحیە، 2,168 گەڕەک، 5,533 گوند.

 

ئەوەی پێویستە بیزانیت: ئەمشەو تا کاتژمێر 12ی شەو قەدەغەی هاتوچۆ دەبێت و قۆناغی دووەمی سەرژمێری کۆتایی پێدێت، ڕۆژانی ئایندە لە قۆناغی سێیەم 26 هەزار بژمێر لە 21 هەزار بلۆکی هەرێمی کوردستان، 77 پرسیارەکە لە خێزانەکان دەکەن و دوای ئەو قۆناغە پرۆسەی سەرژمێری کۆتایی پێدێت.