هاتووچۆی کۆڵبەران لە دەروازەی حاجی ئۆمەران ڕێکدەخرێتەوە

ئاڤا نیوز

بۆ ماوەی دوو ڕۆژ هاتووچۆی کۆڵبەران لە دەروازەی (تەمەرچین) دیوی ڕۆژهەڵاتی کوردستان ڕاگیراوە، بڕیار وایە ڕۆژی شه‌ممه‌ی داهاتوو هاتووچۆی کۆڵبەران بە میکانیزمێکی نوێ دەست پێ بکاتەوە.

وێنە گەورەکە: ڕۆژانە نزیکەی دوو هەزار کۆڵبەری کۆماری ئیسلامی ئێران لەڕێگەی دەروازەى نێودەوڵەتیى حاجى ئۆمەران کەلوپەل بۆ وڵاتەکەیان هاوردە دەکەن، ئەمەش قەرەباڵەغییەکی زۆری لە دەروازەکە دروست کردووە و کاریگەری هەبووە لەسەر باش بەڕێوەچوونی مامەڵەی گەشتیاران و بازرگانان، بۆیە کار بۆ سنووردارکردنی ڕێژەی هاتن و چوونی کۆڵبەران دەکرێت.

لێدوانی فەرمی: سیروان حوسێن، وتەبێژى دەروازەى نێودەوڵەتیى حاجى ئۆمەران بە ئاڤا میدیای ڕاگەیاند، بە ئامانجی باشتر بەڕێوەچوونی هاتن و چوونی گەشتیاران و بازرگانان، ئێمە و دەروازەی تەمەرچین ویستی ئەوەمان هەبووە ڕێژەی هاتن و چوونی کۆڵبەران ڕێک بخەیەنەوە، بۆ ئەم مەبەستەش پێشتر گفتوگۆمان کردووە.

زانیاریی زیاتر: لە چوارچێوەی ڕێکخستنەوەی هاتووچۆی کۆڵبەران، دەروازەی تەمەرچین ڕۆژی پێنج شەممە 20-11-2025 و ڕۆژی هەینی 21-11-2025 هاتووچۆی کۆڵبەرەکانی ڕاگرتووە، بڕیاروایە ڕۆژی شه‌ممه‌ی داهاتوو 22-11-2025 هاتووچۆی کۆڵبەران بە میکانیزمێکی نوێ دەست پێ بکاتەوە، بەجۆرێک ڕۆژانە ڕێژەی هاتن و چوون لە دوو هەزار بۆ هەزار کۆڵبەر کەم بکرێتەوە.

ئەوەی پێویستە بیزانیت: ئەمساڵ حکومەتی ئێران جۆرە کارتێکی بۆ ئەوانە دروستکردووە کە کاری کۆڵبەری بە فەرمی لە مەرزەکان دەکەن بەناوی "کارتی مەرزنشینان"، هەڵگرانی ئەم جۆرە کارتە دەتوانن بە فەرمی کۆڵ لە مەرزەوە بهێنن و بیبەن، ئەمەش زۆرجار وادەکات جەنجاڵی دروست بکات.