سوودانی فەرمان بە بژمێرەكان دەكات ڕۆژی هەینی پرۆسەی سەرژمێری تەواو بكەن

ئاڤا نیوز

 

سەرۆكوەزیرانی عێراق فەرمان بە تیمەكانی سەرژمێری دەكات كە سبەی هەینی پرۆسەی سەرژمێریی ئەو شوێنانەی ماون تەواوبكەن، داواش لە هاووڵاتییان دەكات هاوكاریان بن.

 

وێنە گەورەكە: لەڕۆژانی 20 و 21/ 11/ 2024 پرۆسەی سەرژمێریی گشتی لەسەرجەم پارێزگاكانی عێراق كرا، بەگوێرەی داتا بەدەستهاتووەكانی ناوەندی ئۆپەراسیۆنەكانی سەرژمێری دانیشتووان لە وەزارەتی پلاندانان، لە بەشێك لە پارێزگاكان داتای پێویست بە تیمی بژمێرەكان نەدراوە، ئەوەش ئاستەنگی بۆ سەرخستنی پرۆسەكە دروستكردووە و كارەكان بە تەواونەكراوی ماونەتەوە.

 

ڕاگەیێنراوی فەرمی: نووسینگەی ڕاگەیاندنی سەرۆكی ئەنجوومەنی وەزیرانی عێراق لە بەیاننامەیەكدا ڕایگەیاندووە، محەمەد شیاع سوودانی، سەرۆكوەزیرانی عێراق فەرمانی بە تیمەكانی سەرژمێری كردووە كە پەلەبكەن لە تەواوكردنی پرۆسەی سەرژمێری بۆ هەموو دانیشتووانی عێراق.

زانیاریی زیاتر: سوودانی داواشی لەسەرجەم هاوولاتییان كردووە، هاوكاری تیمە گەڕۆكەكان بن و زانیاری دروستیان پێشكەش بكەن، بەمەبەستی سەرخستنی پرۆسەی سەرژمێری كە گرنگییەكی تایبەتی بۆ گەشەپێدانی سەرجەم سێكتەرەكانی خزمەتگوزاری، ئابووری هەیە و بۆ ئاییندە پشتی پێ دەبەسترێت.