ئومێد خۆشناو: لە دوو ڕۆژی پرۆسەی سەرژمێری 97.39%ی هاونیشتمانیانی هەولێر تۆماركراون

ئاڤا نیوز

 

پارێزگاری هەولێر ڕایدەگەیەنێت لە ماوەی 48 كاتژمێری قۆناغی دووەمی پرۆسەی سەرژمێری، تیمەكانیان توانیویانە ڕێژەی تۆماركردن بگەیەننە 97.39% و سوودیش لە دەرفەتی درێژكردنەوەی ماوەی پرۆسەكە وەردەگرن و ڕێژەكە دەگەیەننە 100%.

 

ڕاگەیێنراوی فەرمی: پارێزگای هەولێر ڕاگەیێنراوێكی بڵاوكردووەتەوە و تیایدا هاتووە، بەپێی ئەو ئامادەکاریی و پلانانەی کە لە ماوەى چەند ڕۆژى ڕابردوودا بەمەبەستی ئەنجامدانى پڕۆسەى سەرژمێرى گشتیى و ڕۆژانى قەدەغەى هاتووچۆ و پابەندبوونی هاونیشتمانییان بە بڕیار و ڕێنماییەکان لەلایەن پارێزگای هەولێر و لێژنەى ئەمنى پارێزگا ئامادەکرابوو، توانرا بە هەوڵ و هەماهەنگى هەموولایەنە پەیوەندیدارەکان لە سنوورى پارێزگای هەولێر ڕێژەى تۆمارکردنى هاوڵاتییان لە قۆناى یەکەم و دووەمی پرۆسەكە، بگاتە 97.39%.

زانیاریی زیاتر: ڕۆژانى ئەنجامدانى پڕۆسەکە بەبێ ڕوودانى هیچ گرفت و ڕووداوێکى نەخوازراو و بە شێوەیەکى سەرکەوتوو و بێ کەموکوڕى بەڕێوەچوو، سەرەڕایی درێژکردنەوەی پڕۆسەکە بۆ 24 کاتژمێری دیکە لەلایەن حکومەتی عێراقی فیدراڵ و پەسندکردنی لەلایەن وەزارەتی ناوخۆی حکومەتی هەرێم بۆ دەرفەتدان بەو هاووڵاتییانەی هێشتا تۆمارنەکراون، وەک پارێزگای هەولێر بەدەرفەتی دەزانین لەو ماوەیەدا ڕێژەی تۆمارکردن لە سنووری پارێزگای هەولێر بگەیەنین بە 100%.

 

ئەوەش بزانە: پارێزگاری هەولێر سوپاسی هاونیشتمانییان و دانیشتووانى شاری هەولێر دەكات كە پابەندی بڕیار و ڕێنماییەکانی ڕۆژانى قەدەغەی هاتووچۆ و تەواوی ڕێنماییەکانیان بوون.