سەرۆک بارزانی: پەنابردن بۆ تیرۆر خۆكوژییە بۆ نەتەوەكەمان

ئاڤا نیوز

 

سەرۆک بارزانی، لە چوارچێوەی بەشداریكردنی لە  پێنجەمین كۆڕبەندی مێپس، گوتارێكی پێشكەش كرد و تیشكی خستە سەر چەند تەوەرێكی گرنگ لە کۆڕبەندەکەدا.

 

وێنە گەورەکە: ئەمڕۆ هەینی 22/ 11/ 2024، بە بەشداری سەرۆك بارزانی و زیاتر لە 120 سەرۆك و كەسایەتییەكانی جیهان و ناوچەكە و عێراق، پێنجەمین کۆڕبەندی ئاشتی و ئاسایشی ڕۆژهەڵاتی ناوەڕاست 'مێپس-2024' لە شاری دهۆك بەڕێوە دەچێت، تەوەری سەرەكی كۆڕبەندەكەش؛ ناكۆكییەكانی ناوچەكە و ئالیەتی ڕێگریكردنە لە فراوانبوونی گرژییەكان.

 

لێدوانی فەرمی: سەرۆک بارزانی ڕایگەیاند: ناونیشانی كۆڕبەندەكە و ناوەڕۆكەكەشی گرنگە، هەموو ناوچەكە ئەمڕۆ پێویستی بە ئاشتی و ئاساییشە، لە هەرێمی كوردستان هەڵبژاردنێكی مێژوویی ئەنجامدرا و سوپاسێكی گەرمی گەلی كوردستان دەكەم كە سەری ئێمەیان بەرز كرد، لەم ڕۆژانە دەست بە گفتوگۆ دەكرێت بۆ دەستبەكاربوونی پەرلەمانی كوردستان و هەنگاوەكانی دواتر.

 

لەلایەكی دیكەوە: لەبارەی کێشەکانی نێوان هەرولێر و بەغدا سەرۆك بارزانی گوتی: باوەڕێكی تەواومان هەیە كە هەموو گرفتەكان بە گفتوگۆ چارەسەر دەكرێن و لێكتێگەیشتنی باش هەیە لەنێوان هەولێر و بەغدا، بڵاوبوونەوەی ماددەی هۆشبەر لە هەموو هەڕەشەكانی دیكە مەترسیدارترە، بە هیوام سنوورێك بۆ ئەو بەربڵاوییەی ماددەی هۆشبەر دابنرێت.

گۆشەیەكی دیكە: سەرۆك بارزانی سەبارەت بە پرسی كورد لە باكووری كوردستان ڕایگەیاند: دەبێت دانیشین و بیر لە چارەسەری ئاشتییانە بكەینەوە بۆ كێشەی گەلی كورد، لە هەر كوێیەك هەر هەوڵێك هەبێت بۆ چارەسەری ئاشتی بە هەموو توانامانەوە لەگەڵی دەبین.

 

ئەوەش بزانە: سەرۆك بارزانی جەختیشی كردەوە کە پەنابردن بۆ تیرۆر، خۆكوژییە بۆ نەتەوەكەمان، بەهیچ شێوەیەك ئامادە نین دەست لە ئایین و مەزهەب و كلتوورمان هەڵبگرین بۆ ئەوەی كەسێكی دیكە لێمان ڕازی بێت.