حکومەتی هەرێمی کوردستان پشووی سەرژمێری درێژکردەوە

ئاڤا نیوز

 

سەرۆكی دیوانی ئەنجوومەنی وەزیرانی هەرێمی كوردستان، بە نووسراوێكی فەرمی دەسەڵات دەداتە وەزیر و بەڕێوەبەرەكان سەبارەت بە مۆڵەتی فەرمانبەران بۆ ڕۆژانی داهاتووی پرۆسەی سەرژمێری.

 

بڵاوكراوەی فەرمی: لە نووسراوەكەدا كە واژووی د.ئومێد سەباح، سەرۆكی دیوانی ئەنجوومەنی وەزیرانی لەسەرە ئاماژە، بەوە دراوە "بەمەبەستی تەواوكردنی قۆناغی كۆتایی سەرژمێری كە پێویستە هەموو زانیارییەكانی خێزان تۆماربكرێن، دەسەڵات دەدرێتە وەزیر و سەرۆكی لایەنی نەبەستراو بە وەزارەت بۆ ئەوەی لای خۆیانەوە دەسەڵات بدەن بە بەڕێوەبەری دامەزراوەكانیان كە بەگوێرەی پێویست مۆڵەتی ڕۆژێك یان زیاتر بدەن بە فەرمانبەر و ئەفسەر و كارمەندانیان بۆ ئەوەی لە ناوچە كوردستانییەكانی دەرەوەی ئیدارەی هەرێم بمێننەوە بۆ تەواوكردنی قۆناغی كۆتایی سەرژمێری."

 

لەلایەكی دیكەوە: سەرۆكی دیوانی ئەنجوومەنی وەزیران لە نووسراوەكەدا ئەوەشی خستووەتەڕوو کە پێویستە بابەتەكە  بە شێوەیەك ڕێكبخرێت كە كاریگەریی لەسەر دەوامی دامەزراوەكان و كاروباری خەڵك و خزمەتگوزارییەكان نەكات.

 

باکگراوند: ڕۆژی چوارشەممە و پێنجشەممە 20 و21ـی ئەم مانگە سەرژمێریی گشتی دانیشتووان لە سەرجەم ناوچەکانی عێراق و هەرێمی کوردستان دەستیپێکرد و ماوەی دوو ڕۆژیش قەدەغەی هاتووچۆ  ڕاگەیێنرا.