هەفتەی داهاتوو ناتۆ و ئۆکراینا لەسەر پرسی گۆڕانکاری لە جەنگ کۆدەبنەوە

ئاڤا نیوز

 

بەهۆی ئەو گۆڕانکارییەی لە جەنگی نێوان ڕووسیا و ئۆکراینا هاتووەتە ئاراوە لە شێوازی جەنگدا، هەفتەی داهاتوو سەرۆکی ئۆکراینا لەگەڵ ناتۆ کۆدەبێتەوە.

 

وێنە گەورەکە: پاش ئەوەی ئەمریکا ڕێگای بە ئۆکراینا دا مووشەکی دوورمەودای ئەمریکی بەکاربێنێت دژی ڕووسیا، ڤلادیمێر پووتین، سەرۆکی ڕووسیا، ڕێگایدا سووپاکەی مووشەکێکی نوێ بەکاربێنێت کە مووشەکێکی بالیستییە و ناوی ئۆریشنیکە. هاوکات پووتین ئەوەشی خستوەتەڕوو کە سیستەمی بەرپەرچدانەوەی ئەمریکی ناتوانێت ڕێگربێت لە ئۆریشنیک و ئامانجەکەی خۆی دەپێکێت. 

 

لەلایەکی دیکەوە: ڤۆلۆدیمیر زێلێنسکی، سەرۆکی ئۆکراینا، داوای لە هاوپەیمانەکانی کردووە کە هێزی بەرگری ئاسمانی زیاتر بدرێت بە وڵاتەکەی، دوای ئەو هێرشەی بە مووشەکی ئۆریشنیک کرایە سەر ئۆکراینا. 

 

زانیاری زیاتر: کریملن ڕایگەیاند، بەکارهێنانی مووشەکی ئۆریشنیک ئاگادرکردنەوەی خۆرئاوا بوو. هاوکات هێرشەکان زیاتر دەبن گەر مەترسییەکانی سەر ڕووسیا لەبەرچاو نەگیرێت. 

 

پێویستە ئەوەش بزانیت: بەکارهێنانی ئەو مووشەکە لەلایەن ڕووسیاوە، دڵەڕواکێی لەوڵاتانی خۆرئاوا دروستکردووە. دۆناڵد تۆسک، سەرۆک وەزیرانی پۆڵەندا ڕایگەیاند، بەکارهێنانی ئەو مووشەکە لەلایەن ڕووسیاوە بەرەو مەترسییەکی گەورەمان دەبات.