د.به‌رهه‌م ساڵح وه‌ك كۆمیسیاری باڵای نه‌ته‌وه ‌یه‌كگرتووه‌كان بۆ كاروباری په‌نابه‌ران ده‌ستبه‌كاربوو

ئاڤا نیوز

 

دوای ئەوەی د. بەرهەم ساڵح بۆ پۆستی "کۆمیسیاری باڵای نەتەوەیەکگرتووەکان بۆ کاروباری پەنابەران "دەستنیشانکرا، ئەمڕۆ پێنجشەممە 1-1-2026، بەرپرسیارێتی فیلیپۆ گراندی لەم پۆستە کۆتایی هات و د. بەرهەم ساڵح بەشێوەیەکی فەرمی یەکەم رۆژی دەستبەکاربوونی راگەیاند.

 

ڕاگەیێندراوی فەرمی: فیلیپۆ گراندی، ئیتاڵی له‌ هه‌ژماری تایبه‌تی خۆی له‌ تۆڕی ئێکس نووسیویەتی: هیوای باشترین بۆ بەرهەم ساڵح دەخوازم لەگەڵ دەستپێکردنی ماوەی ئەرکەکەی وەک دوازدەهەمین كۆمیسیاری باڵای نه‌ته‌وه ‌یه‌كگرتووه‌كان بۆ كاروباری په‌نابه‌ران.

 

لێدوانی فەرمی: لای خۆیەوە، د، بەرهەم ساڵح لە تۆری ئێکس نووسیویەتی، ئەمڕۆ وەک كۆمیسیاری باڵای نه‌ته‌وه‌ یه‌كگرتووه‌كان بۆ كاروباری په‌نابه‌ران ده‌ستبه‌كاربووم، بە پێی ڕێنمایی و دەسەڵاتی یاساییمان و بە هەماهەنگی لەگەڵ هاوبەشانمان و ئەو وڵاتانەی میوانداریمان دەکەن کار دەکەین بۆ پاراستنی پەنابەران، گەیاندنی چارەسەری بەردەوام و ڕووبەڕووبوونەوەی قەیرانەکانی ئاوارەبوون کە کاریگەرییان لەسەر ملیۆنان کەس هەیە.

 

باکگراوند: ڕۆژی 12-12-2025، د. بەرهەم ساڵح دوای ئەنجامدانی پرۆسەیەکی وردی هەڵسەنگاندن و چاوپێکەوتن لەلایەن لیژنەیەکی باڵای نەتەوە یەکگرتووەکانەوە لە نیویۆرک دەستنیشان کرا، پرۆسەکە ڕاستەوخۆ بە سەرۆکایەتیی ئەنتۆنیۆ گۆتێرێز، ئەمینداری گشتیی نەتەوەیەکگرتووەکان بەڕێوەچوو، دواتریش لە 18-12-2025، ئه‌نجوومه‌نی گشتیی نه‌ته‌وه ‌یه‌كگرتووه‌كان، د. به‌رهه‌م ساڵحی به‌ كۆمیسیاری باڵای نه‌ته‌وه ‌یه‌كگرتووه‌كان بۆ كاروباری په‌نابه‌ران هه‌ڵبژارد.

 

زانیاری زیاتر: كۆمیسیاری باڵای نه‌ته‌وه ‌یه‌كگرتووه‌كان بۆ كاروباری په‌نابه‌ران، بە دووەم گرنگترین پۆست دادەنرێت لە دوای سكرتێری گشتیی نەتەوە یەكگرتووەكان و زیاتر لە 70 ساڵە هیچ كەسایەتییەك لە ڕۆژهەڵاتی ناوەڕاست ئەم پۆستەی وەرنەگرتووە، زیاتر كەسایەتییە ناودارەكانی وڵاتانی ئەوروپا ئەم پۆستەیان وەرگرتووە.

 

لەلایەکی دیکەوە: ڕۆڵی سەرەکیی د. بەرهەم ساڵح لەم پۆستەدا بریتی دەبێت لە چاودێریکردن و سەرپەرشتیکردنی سەرجەم هەوڵە نێودەوڵەتییەکان بۆ پاراستنی مافی پەنابەران و پاراستن و بەدواداچوون بۆ دۆخی نزیکەی 123 ملیۆن ئاوارە و پەنابەر لە سەرانسەری جیهاندا.

 

زانیاریی کەسیی: د.به‌رهه‌م ئه‌حمه‌د ساڵح له‌دایكبووی 8-9-1960ی شاری سلێمانییه‌، سیاسه‌تمه‌دارێكی كوردی عێراقه‌ و له‌ 2ی (تشرینی یه‌كه‌م/10)ی 2018 تا 13ی (تشرینی یه‌كه‌م/10)ی 2022 وه‌ك سه‌رۆكی عێراق كاری كردووه‌ ، پێشتریش وه‌ك جێگری سه‌رۆكوه‌زیرانی عێراق و سه‌رۆكوه‌زیرانی هه‌رێمی كوردستان كاری كردووه‌.