بەهۆی بەفربارینەوە ئاستەنگی هاتووچۆ لە سنووری دهۆک و زاخۆ دروست بووە

ئاڤا نیوز

ڕێژەیەکی زۆر بەفر لە سنووری پارێزگای دهۆک و ئیدارەی سەربەخۆی زاخۆ باریوە، بەو هۆیەوە ژمارەیەک ڕێگا داخراون و هاتووچۆ پەکی کەوتووە.

لێدوانی فەرمی: ئیسماعیل محەممەد، بەڕێوەبەری ناحیەی چەمانکێی سەر بە قەزای ئامێدی، بەهۆی بەفربارینەوە، ئاستەنگی هاتووچۆ لە چەند ڕێگایەکی ئامێدی دروست بووە، پێنج هاووڵاتیش لەناوچەکە گیریان خواردووە، تیمەکانمان گەیشتوونەتە شوێنەکە و سەرقاڵی ڕزگارکردنیانن و تەندروستیان باشە.

لەلایەیکی دیکەوە: بەڕێوەبەرایەتیی هاتووچۆی دهۆک، ڕایگەیاندووە، ڕێگای ئامێدی- دهۆک بۆ ماوەی چەند کاتژمێرێک داخراوە داوا لە هاووڵاتیان دەکەین ئەم ڕێگایە بەکارمەهێنن تاوەکو پاک دەکرێتەوە.

زانیاریی زیاتر: پەیامنێرانی ئاڤا لە سنووری دهۆک و ئیدارەی سەربەخۆی زاخۆ، ڕایگەیاند، زۆربەی ناوچەکانی دهۆک و ئیدارەی سەربەخۆی زاخۆ بەفر باریوە و ئاستەنگی هاتووچۆ دروست بووە، داوا لە هاووڵاتیان دەکرێت بۆ کاری پێویست نەبێت نەهێنە دەرەوە.

ئەوەی پێویستە بیزانیت: بە پێی ئەو زانیارییانەی دەست ئاڤا کەوتووە، ئەو ڕێگایانەی ئاستەنگی هاتووچۆی بۆ دروست بووە، بریتیین لە:

- ئامێدی – دهۆک

- ڕێگای چیای پێرس

- ڕێگای چیای گارە

- ڕێگای ناحیەی زاوێتە

- بەشێکی ڕێگاکانی سنووری ئیدارەی سەربەخۆی زاخۆ