باڵیۆزی ئێران لە عێراق: ئەرکمانە حەشد بەهێز بکەین و داوای دەرچوونی هێزە بیانییەکان بکەین

ئاڤا نیوز

باڵیۆزی ئێران لە عێراق دەڵێت، حەشدی شەعبی "باڵی بەهێزی گەلی ئیسلامە و ئەرکە لەسەرمان پشتیوانی بکەین و بەهێزی بکەین"، داواش دەکات سەرجەم هێزە بیانییەکان بە تەواوی خاکی عێراق جێبهێڵن.

وێنە گەورەکە: هەوڵەکانی ئەمریکا بۆ چەککردنی هێزە چەکدارەکانی عێراق لە نێویاندا حەشدی شەعبی بەردەوامن، حکومەتی عێراقیش دەیەوێت تەنیا چەک لەدەستی دەوڵەت بێت و گرووپە چەکدارەکان تێکەڵ بە هێزە ئەمنییەکان بکرێن.

لێدوانی فەرمی: محەممەد کازم ئالسادق، باڵیۆزی ئێران لە عێراق، ڕۆژی چوارشەممە بەشداریی لە ڕێوڕەسمی ساڵیادی کوژرانی قاسم سولەیمانی فەرماندەی پێشووی فەیلەقی قودسی سوپای پاسداران و ئەبومەهدی موهەندیس، جێگری سەرۆکی دەستەی حەشدی شەعبی کرد و ئاماژەی بەوەكرد، حەشدی شەعبی "شانازییە بۆ عێراق و باڵی بەهێزی گەلی ئیسلامە، بۆیە ئەرک و واجبە پشتیوانی ئەم هێزە بکەین و بەهێزتری بکەین، هەروەها ئەرکە داوا بکەین هێزە بیانییەکان بە تەواوی عێراق جێبهێڵن".

وتیشی، بۆ بەدیهێنانی ئارامی، ئاسایش و سەربەخۆیی وڵات، ئێران بە هەموو شێوەیەک پشتیوانی حکومەت و گەلی عێراق دەکات.

باکگراوند: ڕۆژی 03-01-2020، بە فەرمانی دۆناڵد ترەمپ، سەرۆکی ئەمریکا فڕۆکەی بێ فڕۆکەوانی ئەو وڵاتە، هەریەکە لە قاسم سولەیمانی و ئەبو مەهدی موهەندیسی لە فڕۆکەخانەی نێودەوڵەتیی بەغدا کردە ئامانج. 

دوو ڕۆژ دواتریش لە 05-01-2020، پەرلەمانی عێراق بڕیارێکی دەرکرد بۆ چوونە دەرەوەی هێزە بیانییەکان، بەڵام تاوەکو ئێستا جێبەجێ نەکراوە.