ڕۆمانێکی بەختیار عەلی وەک باشترین 100 کتێبی سەدەی 21 دەستنیشان دەکرێ

ئاڤا نیوز

یەکێک لە ڕۆژنامە بەناوبانگەکانی سویسرا ڕۆمانی "دواهەمین هەناری دونیا"ی بەختیار عەلی لە ڕیزبەندی باشترین 100 کتێبی سەدەی 21 داناوە.

 

وێنە گەورەکە: بەختیار عەلی، یەکێکە لە ڕۆماننوسە بەناودەنگەکانی ئەدەبیاتی کوردی و زۆربەی ڕۆمانەکانی بە ژانری ڕیالیزمی سیحری نووسیوە و خاوەنی 13 ڕۆمان و هەشت دیوانی شیعری و 16 کتێبی فیکریە.

 

ڕاگەیێنراوی فەرمی: لاپەڕەی فەرمی بەختیار عەلی لە تۆڕی کۆمەڵایەتی فەیسبووک ئەمەی بڵاوکردوەتەوە " ئەمڕۆ ڕۆژنامەی نیو زیورخیشەر تزایتونگ NZZ ، بە بۆنەی نزیکبوونەوەمان لە تێپەڕاندنی چارەکە سەدەیەک لە سەدەی بیست و یەک، لیستی باشترین 100 سەد کتێبی سەدەی 21 ی لە بوارەکانی ئەدەبیات و مەعریفەدا بڵاوکردەوە، شانازییەکی گەورەی ئێمەیە، بڵێین "دواهەمین هەناری دونیا" لە ناو سەدان هەزار کتێب و دەیان هەزار نوسەری دونیادا، شوێنی خۆی لە ناو سەد باشترین کتێبی سەدەی بیست و یەکی دونیادا کردۆتەوە".

 

لەلایەکی دیکەوە: ئاڤا میدیا لە لاپەڕەی ڕۆژنامەی "نیو زیورخیشەر تزایتونگ NZZ" بەدواداچوونی بۆ ڕیزبەندی کتێبەکان کردووە، کتێبی "دواهەمین هەناری دونیا" لە ڕیزبەندی 80-ی باشترینی ئەو 100 کتێبانەیە کە ڕۆژنامەکە دیاریکردووە.

 

ئەمەش بزانە: ڕۆژنامەی "نیو زیورخیشەر تزایتونگ" لە ساڵی 1780-ەوە لە سویسرا دەردەچێت و بە یەکێک لە ڕۆژنامە کۆنەکانی جیهان هەژمار دەکرێت.

 

باکگراوند: ڕۆمانی "دواهەمین هەناری دونیا" سێیەم ڕۆمانی بەختیار عەلییە و لە ساڵی 2002 بڵاوکراوەتەوە و تا ئێستا بۆ سەر زمانەکانی "ئەڵمانی، فارسی، عەرەبی، تورکی، ئیتالی، فەرەنسی، ئینگلیزی" وەرگێڕدراوە.