لە كەركووك دوو ژن خۆیان دەكەن بە تیمی سەرژمێری و شەش ملیۆن دینار لە ماڵێك دەدزن

ئاڤا نیوز

 

لە یەكێك لە گەڕەكەكانی شاری کەرکووک، دوو ژن خۆیان دەكەن بە تیمی سەرژمێری و دەچنە نێو ماڵێكەوە، خاوەن ماڵەكە بێ هۆش دەكەن و شەش ملیۆن دیناریش دەدزن.

لێدوانی فەرمی:  سەرچاوەیەك لە پۆلیسی كەركووك بە ئاڤا نیوزی ڕاگەیاند:  پێش نیوەڕۆی ئەمڕۆ دوو ژن كە جلوبەرگی هاوشێوەی تیمەكانی سەرژمێرییان لەبەر كردووە و خۆیان وەك بژمێر ناساندووە و چوونەتە ماڵێك لە گەڕەكی عروبەی شاری کەرکووک.

 

زانیاریی زیاتر: ماڵەكە تەنیا ئافرەتێكی تێدا بووە، دوو دزەكەش هەلەكەیان قۆستووەتەوە و سپڕای بێهۆشكردنیان بەكارهێناوە و خاوەن ماڵەكەیان بێ هۆش كردووە، پاشان بە ماڵەكەدا گەڕاون و بڕی شەش ملیۆن دیناریان دزیوە.

 

لەلایەكی دیكەوە: بەپێی گوتەی سەرچاوەكەی پۆلیس، تاوەكو ئێستا تۆمەتبارەكان دەستگیر نەكراون و تیمەكانی پۆلیس سەرقاڵی گەڕان و بەدواداچوونن.