مەسرور بارزانی: نابێت پێگەی سیاسی و هێز بێیتە پاساوی بازرگانی ماددەی هۆشبەر

ئاڤا نیوز

 

لە وتاری دانانی بەردی بناغەی سەنتەری هۆشیاری و شیاندنەوەی ئالوودەبووانی ماددەی هۆشبەر، سەرۆکوەزیران بارزانی وتی، "پێویستە پێگەی سیاسی و هێز  نەبێتە پاساو بۆ ئەو بازرگانانەی ژیانی خەڵکیان خستووەتە مەترسی".

 

وێنە گەورەکە: بەهۆی ئەوەی هەرێمی کوردستان و عێراق چەندین سنووری هاوبەشییان لەگەڵ وڵاتانی ئێران و تورکیا و سوریا هەیە، ئەم ناوچەیە بووەتە ترانزێتی گواستنەوەی ماددە هۆشبەرەکان.

 

لێدوانی فەرمی: سەرۆکوەزیران مەسرور بارزانی، لە کاتی دانانی بەردی بناغەی سەنتەری هۆشیاری و شیاندنەوەی ئالوودەبووانی ماددەی هۆشبەر وتی، سوپاسی ڕێکخراوی LDSی ئەمریکی دەکەم کە 10 ساڵە بوونەتە هاوبەشی ڕێکخراوی خێرخوازی بارزانی. پرسی بەرەنگاربوونەوەی مادە هۆشبەرەکان بەلای حکومەتەوە یەکێکە لە پرسە گرنگەکان و بەفراوانی کاری لەسەر دەکرێت. حکومەت لیژنەیەکی پێکهێناوە و بودجەی تەرخانکردووە، دروستکردنی ئەم سەنتەرە بە شێکە لەو هەوڵەی حکومەت.

 

زانیاریی زیاتر: سەرۆکوەزیران مەسرور بارزانی ئەوەشی وت، گرنگە بە توندترین شێوە ڕووبەڕووی مافیاکان و بازرگانانی ماددەی هۆشبەر ببینەوە، هاوکات گرنگە جیاوازی لەنێوان مافیاکان و بەکارهێنەرانی ماددەی هۆشبەر بکەین، بەکارهێنەران پێویستیان بە چاودێری و یارمەتیدان هەیە بۆ دووبارە گەڕانەوەیان بۆ ناو کۆمەڵگە. سوپاسی دەزگا ئەمنییەکان دەکەم بە هێزەوە ڕووبەڕووی بازرگانانی ماددەی هۆشبەرە بوونەتەوە، داوا لە وەزارەتی پەروەردە و خوێندنی باڵا دەکەم میکانیزمی توندتر بگرنە بەر بۆ چاودێری قوتابیان. 

سەرکوەزیران مەسرور بارزانی ئەمەشی وت، " داوا لە حکومەتی فیدڕاڵ دەکەین بە گڕوتین تر ڕووبەڕووی ئەو دۆخە ببنەوە کە ڕووی لەناوچە کردووە". 

باکگراوند: سەنتەری هۆشیاری و شیاندنەوەی ئالوودەبووانی ماددەی هۆشبەر، دەکەوێتە سەر شەقامی 120 مەتری هەولێر، لەڕێگەی سێ قۆناغ یارمەتی ئالوودەبووانی ماددەی هۆشبەر دەدات، ئەوانیش؛ هۆشیارکردنەوە، پاککردنەوەی جەستە و گەڕانەوە بۆ کۆمەڵگە.