لیژنەیەکی هاوبەش لەنێوان هەولێر و بەغدا بۆ بودجە و مووچە پێکدەهێنرێت

ئاڤا نیوز

ئەنجوومەنی وەزیرانی عێراق بڕیاری دا بۆ حیساباتی کۆتایی ئەمساڵ، لیژنەیەکی هاوبەش لەنێونا هەردوو حکومەتی هەرێمی کوردستان و حکومەتی فیدراڵی پێکبهێنرێت.

 

وێنە گەورەکە: ئەمڕۆ سێشەممە ئەنجوومەنی وەزیرانی عێراق بە سەرپەرشتی محەممەد شیاع سوودانی کۆبووەوە و پرسی دارایی و مووچەی مووچەخۆرانی هەرێمی کوردستان تاوتوێ کرا.

زانیاریی تایبەت: لە کۆبوونەوەی ئەنجوومەنی وەزیران بڕیار دراوە لیژنەیەكی هاوبەش لە نێوان هەردوو حکومەتی عێراق و هەرێمی کوردستان پێكبهێنرێت بۆ پێداچوونەوە و ئامادەكردنی حیسابی کۆتایی بودجە و مووچەی ئەمساڵ.

 

لەلایەکی دیکەوە: ئاڤا زانیویەتی ئەنجوومەنی وەزیرانی عێراق بڕیاری داوە بۆ مووچەی سێ مانگی کۆتایی ئەمساڵ، واتە 10 و 11 و 12، بۆ هەر مانگێک بڕی 760 ملیار دینار خەرج بکات. واتە بە کۆی گشتی دەکاتە دوو تریلیۆن و 280 ملیار دینار.

ئەمەش بزانە: حکومەتی هەرێمی کوردستان بۆ مووچەی مانگی 10 پێویستی بە 996 ملیار دینارە، بەمپێیە بڕی 236 ملیار دینار کورتهێنان دروست دەبێت، بۆ هەرسێ مانگیش قەبارەی کورتهێنان دەبێتە 708 ملیار دینار.