بەهۆی بایكۆتكردنی ئەندامێك كۆبوونەوەی ئەنجوومەنی پارێزگای كەركووك نەكرا

ئاڤا نیوز 

بڕیار بوو كۆبوونەوەی نۆیەمی ئەنجوومەنی پارێزگای كەركووك بکرێت، بەڵام بەهۆی بایكۆتی ئەندامێك كۆبوونەوەکە نەكرا.

وێنە گەورەكە: وا بڕیار بوو ڕۆژی سێشەممە 26-11-2024، كۆبوونەوەی ئەنجوومەنی پارێزگای كەركووك بەڕێوەبچێت، بەڵام بەهۆی ئەوەی زاهر ئەنوەر عاسی، ئەندامی ئەنجوومەنەكە لە هاوپەیمانیی عروبە ئامادەی كۆبوونەوەكە نەبوو، كۆبوونەوەی فەرمی نەکرا، لەبری ئەوەش كۆبوونەوەیەكی ڕاوێژكاری نەکرا.

ئەوەی پێویستە بیزانیت: ئەنجوومەنی پارێزگای کەرکووک لە 16 ئەندام پێکدێت و بۆ هەر کۆبوونەوەیەک پێویستە سەدا 50 کۆ یەک ئامادەبن کە دەکاتە 9 ئەندام، بەهۆی ئەوەی لایەنە ناڕازییەکانیش (پارتی، بەشێکی هاوپەیمانی عەرەبی و بەرەی تورکمانی) کە 8 ئەندامیان هەیە، تاوەکو ئێستا بەشداریی کۆبوونەوەکان ناکەن.

هۆکارە زانراوەکان: بەپێی زانیارییەكانی ئاڤا نیوز، زاهیر ئەنوەر عاسی، كە یەكێك بوو لە هاوپەیمانەكانی یەكێتیی نیشتمانیی كوردستان لە كۆبوونەوەی هۆتێل ڕەشیدی بەغدا بۆ پێکهێنانی حکومەتی خۆجێی کەرکووک، ناڕازییە لە جێبەجێنەكردنی یەكێك لە خاڵە سەرەكییەكانی ڕێككەوتنەكەی هۆتێل ڕەشید، ئەویش بریتییە لە ئازادكردنی ژمارەیەك زیندانیكراو كە تۆمەتی تیرۆریان لەسەرە.

زانیاریی زیاتر: لەو كۆبوونەوە ڕاوێژكارییەی ئەنجوومەنی پارێزگای كەركووكدا، میوانداریی هەریەك لە بەڕێوەبەری هاتووچۆی كەركووك و بەڕێوەبەری بەرەنگاربوونەوەی ماددە هۆشبەرەكان و بەڕێوەبەرایەتیی نەهێشتنی تاوانی ڕێكخراوەكانی کرا، چەند بابەتێكی پەیوەست بەو بەڕێوەبەرایەتییانە گفتوگۆیان لەبارەوە كرا.

لەلایەکی دیکەوە: بەگوتەی ئەندامە ئامادەبووەكانی كۆبوونەوەكە كە لە كۆنفڕانسێكی ڕۆژنامەوانیدا قسەیان كرد، هۆكاری ئامادەنەبوونی زاهیر ئەنوەر عاسی بەهۆی نەخۆشییەوە بووە.