ناوەڕۆکی کۆبوونەوەکەی ئەنجوومەنی وەزیران لەبارەی مووچە و سەرژمێری

ئاڤا نیوز

 

ئەمڕۆ چوارشەممە 27ی نۆڤێمبەری 2024، بە سەرپەرشتی سەرۆکوەزیران مەسرور بارزانی و ئامادەبوونی قوباد تاڵەبانی، جێگری سەرۆکوەزیران، ئەنجومەنی وەزیرانی هەرێمی کوردستان کۆبووەوە؛ تەوەری سەرەکی کۆبوونەوەکە بابەتی مووچەی فەرمانبەران و سەرژمێریی گشتیی دانیشتووان بوو.

 

ڕاگەیێنراوی فەرمی: بەگوێرەی ڕاگەیێنراوی ئەنجوومەنی وەزیران لە كۆبوونەوەكەدا سێ پرسی گرنگ تاوتوێ کران لەوانە: مووچەی سێ مانگی كۆتایی ئەمساڵی فەرمانبەران، پرسی سەرژمێریی گشتیی دانیشتووان  و بەقیستکردنی ئەو بڕە پارەیەی لە هاووڵاتیی زێدەڕۆکار وەردەگیرێت.

 

ئەوەی پێویستە بیزانیت: لەبارەی هەوڵەکان بۆ دابینکردنی سێ مووچەکەی کۆتایی ئەمساڵ ئەنجوومەنی وەزیرانی هەرێمی كوردستان  ڕایگەیاند:  لە هەوڵەکانمان بەردەوامین لەگەڵ حکومەتی فیدراڵ سەبارەت مووچە و شایستە داراییەکانی هەرێمی کوردستان بە تایبەت بۆ دابینکردنی مووچەی سێ مانگی کۆتایی ئەمساڵ.

  
لەلایەکی دیکە: هاوپەیوەند بە سەرژمێری گشتیی دانیشتووان ئەنجوومەنی وەزیران، نیگەرانی خۆی لە هەژمارنەکردنی سەدان هەزار کەس لە دانیشتووانی سنووری هەرێمی کوردستان لە قەزای شێخان، زلکان،  کەڵەکچی و ناحیەی فایدە و بەشێک لە قەزای سێمێل، قەزاکانی بەردەڕەش، خەبات و مەخموور لە سەر دانیشتووانی هەرێمی کوردستان دەربڕی و داوایکرد، حکومەتی فیدراڵ، ئەو ڕێکارە  ڕاست بکاتەوە و ئەو خەڵکانە بخاتەوە شوێنی ڕاستی خۆی کە هەرێمی کوردستانە.

 

زانیاریی زیاتر: بڕگەی دووەمی كۆبوونەوەكە تایبەت بوو بە خستنەڕووی پێشنیارێک لەلایەن ساسان عەونی، وەزیری شارەوانی و گەشتوگوزار تایبەت بە پاژەکردن (بەقیستکردن)ی ئەو بڕە پارەیەی لە هاووڵاتی زێدەڕۆکار وەردەگیرێت، کە خانووی نیشتەجێیان بە زێدەڕۆیی لە سنووری شارەوانییەکان دروستکردووە بۆ مەبەستی نیشتەجێبوون، بە گوێرەی سەرجەم ئەو مەرج و پێداویستیانەی لە یاسای ژمارە سێی ساڵی 2019 ی هەموارکراو بە یاسای ژمارە حەوتی ساڵی 2021 هاتووە، کە تەنیا ئەو هاووڵاتییانە دەگرێتەوە کە بەهۆی نەبوونی شوێنی نیشتەجێبوون، زێدەڕۆییان لەسەر زەوی گشتیی کردبوو لە چوارچێوەی سنووری شارەوانیەکان.

 

ئەمەش بزانە:  هەر لە کۆبوونەوەکەدا  پێشنیازی بڕە پارەیەی لە هاووڵاتی زێدەڕۆکار وەردەگیرێت پەسەند کرا ئەمەش وەک ئاسانکارییەک بۆ ئەو هاووڵاتیيانەی کە یاساکانی ئاماژەپێدراو، دەیانگرێتەوە و توانای داراییان سنووردارە و لە توانایاندا نیە ، کە بڕی پارەی تەملیکی زەویەکە بە یەکجار بدەن.