حکومەتی عێراق: هەموو ڕێوشوێنێکی یاسایی و سەربازی بۆ پاراستنی سەروەری وڵات دەگرینەبەر

ئاڤا نیوز 

گوتەبێژی حکومەتی عێراق ڕایدەگەیێنێت، ئەنجوومەنی وەزرای بۆ ئاسایشی نیشتمانی ستراتیژی ئەمنی و سەربازی بۆ ڕووبەڕووبوونەوەی هەر هەڕەشەیەک داڕشتووە بۆ پاراستنی سەروەری خاکەکەشی هەموو ڕێوشێنێک دەگرێتە بەر.

 

چیرۆکی سەرەکی: باسم عەوادی، گوتەبێژی حکومەتی عێراق لە میانی دیدارێکی ڕۆژنامەوانیدا تیشکی خستە سەر بابەتی ئاگربەستی نێوان ئیسرائیل و حیزبوڵڵا لە لوبنان و هەنگاوەکانی حکومەت لە ئەگەری هەر هەڕەشەیەک بۆ سەر خاکەکەی.

 

لێدوانی فەرمی: بە گوتەی باسم عەوادی ئاگربەست هەنگاوێکی گرنگ بوو بۆ ئەوەی لە جەنگێکی سەرتاسەری دوورمان بخاتەوە، ئەو ئاگربەستەش لە لوبنان دەبێتە بنەمایەک بۆ ئاگربەست لە غەززە.

 

لە هەمان کاتدا: عێراق ڕۆڵێکی سەرەکی و میحوەری بینی لە هەماهەنگی نێوان وڵاتان بۆ گەیشتن بە ئەنجامی ئاگربەستەکە، هاوکات وەکو عێراق بەردەوام دەبین لە هاوکاریکردنی غەززەو لوبنان تا ئەوکاتە سەقامگیری دێتە ئاراوە. عەوادی وادەڵێت.

 

بە تەنیشت ئەم بابەتەوە: پەیوەست بە هەڕەشەکانی ئیسرائیل بۆسەر گرووپە چەکدارەکانی عێراق، عەوادی ئەوەی ڕاگەیاند: ئەنجوومەنی وەزرای بۆ ئاسایشی نیشتمانی ستراتیژی ئەمنی و سەربازی بۆ ڕووبەڕووبوونەوەی هەر هەڕەشەیەک داڕشتووەو حکومەت هەموو ڕێوشوێنێکی یاسایی و سەربازی بۆ پاراستنی سەروەری وڵات دەگرێتەبەر.

 

لەلایەکی دیکە: سەبارەت بە مامەڵەیان لەگەڵ ئیدارەی نوێی ئەمریکا، گوتەبێژی حکومەتی عێراق ڕایگەیاند: مامەڵەمان لەگەڵیان بەپێی بەرژەوەندییەکانی عێراق دەبێت.