ترەمپ: سەرۆکی مەکسیک ڕازیبووە بە ڕێگریکردن لە کۆچ بۆ ئەمریکا

ئاڤا نیوز

 

دۆناڵد ترەمپ، سەرۆکی هەڵبژێردراوی ئەمریکا ڕایگەیاند کە کلاودیا شینباوم، سەرۆکی مەکسیک لە ڕێگەی پەیوەندییەکی تەلەفۆنی ڕەزامەندی خۆی بۆ ڕاگرتنی کۆچی نایاسایی لە وڵاتەکەی خۆیەوە بۆ ئەمریکا نیشانداوە. لە بەرامبەردا سەرۆکی مەکسیک ئەم قسانەی ترەمپی ڕەتکردووەتەوە.

 

وێنە گەورەکە: ترەمپ بەڵێنی داوە لەگەڵ دەستبەکاربوونی وەک سەرۆکی نوێی ئەمریکا، دەرگای وڵاتەکەی بە ڕووی کۆچی نایاسایی ڕابگرێت و کۆچبەری نایاساییەکانیش دیپۆرت بکاتەوە.

 

بڵاوکراوەی فەرمی: ترەمپ لە تۆڕی کۆمەڵایەتی ئێکس ڕایگەیاند، گفتووگۆیەکی باشم لەگەڵ شینباوم، سەرۆکی مەکسیک کرد، ڕێککەوتین لەسەر ئەوەی کۆچی نایاسایی لە مەکسیکەوە بۆ ئەمریکا ڕابگرێت.ئەمەش بە واتای داخستنی توندی سنووری باشوورمانە.

 

بۆچوونی لایەنی بەرامبەر: شینباوم وەڵامی ترەمپ دەداتەوە و دەڵێت: هەڵوێستی مەکسیک "دانەخستنی سنوورە لەگەڵ ئەمریکا".

 

سەرۆکی مەکسیک لە ئێکس ڕایگەیاند، من ئەو ستراتیژییە گشتیەم بۆ ڕوونکردەوە کە مەکسیک پەیڕەوی لێدەکات بۆ مامەڵەکردن لەگەڵ دیاردەی کۆچکردندا دووبارەی دەکەینەوە کە هەڵوێستی مەکسیک داخستنی سنوورەکان نییە، بەڵکو دروستکردنی پردێکە لە نێوان حکومەتەکان و لە نێوان گەلەکاندا.