لە دەریای ئیجە دوو کۆچبەری کورد خنکان

ئاڤا نیوز

 

لە دەریای ئیجەی نێوان تورکیا و یۆنان، بەلەمێکی کۆچبەران ژێرئاو کەوت و لە ئەنجامیشدا ژن و منداڵێکی خەڵکی هەرێمی کوردستان خنکاون.

 

وێنە گەورەکە: دەریای ئیجە بە یەکێک لە ڕێگا سەرەکییەکانی کۆچی هاووڵاتییانی هەرێمی کوردستان و عێراق بۆ وڵاتانی ئەوروپا دادەنرێت، ڕێگاکەش پڕ مەترسییە و لە دۆخی نالەباری کەشوهەوادا هەندێکجار کۆچبەران دەبنە قوربانیی.

 

لێدوانی فەرمی: ڕەنج پشدەریی، چالاکوانی بواری کۆچبەران بە ئاڤا میدیای گووت، ئەو بەلەمەی ئەمڕۆ ژێرئاو کەوتووە 35 کەسی تێدابووە و پێنج کۆچبەریان کورد بوون کە دووانیان ڕزگار کراون.

 

ئەو چالاکوانە ئاماژەی بەوەش کرد، لە ئەنجامی ڕووداوەکەدا پێنج کۆچبەر خنکاون کە دووانیان کوردن و پێکهاتوون لە ژن و منداڵێک، ژنەکە خەڵکی قەزای ڕانیەی سەر بە پارێزگای سلێمانی بووە، هاوسەرەکەشی کە خەڵکی چەمچەماڵ بووە نەخنکاوە و ڕزگاریی بووە.

 

لەلایەکی دیکەوە: میدیای یۆنان لەسەر ئەم ڕووداوە ئاماری جیاواز بڵاودەکاتەوە و دەڵێت، لە دەرئەنجامی ژێرئاکەوتنی ئەو بەلەمە، دوو ژن و دوو منداڵ گیانیان لەدەستداوە و 16 کۆچبەریش ڕزگارکراون.