هۆڵەندا کۆرسی ڕاهێنان بۆ ڕۆژنامەنووسانی عێراق و هەرێمی کوردستان دەکاتەوە

 ئاڤا نیوز

وەزارەتی دەرەوەی هۆڵەندا لە ڕێگەی پرۆگرامی سکولەرشیپی میناوە، کۆرسی ڕاهێنانی کورتخایەن بۆ ڕۆژنامەنووسانی عێراق دەکاتەوە، ڕۆژنامەنووسانیش دەتوانن لە رێگەی پێشکەشکردنی داواکاریی بەشداریکردنەوە سوودمەندبن لەم دەرفەتە.

 

پرۆژەکە چییە: بریتییە لە کۆرسێکی ڕاهێنانی کورتخایەن لە وڵاتی هۆڵەندا کە ماوەکەی لەنێوان دوو بۆ سێ هەفتەدایە و سەرجەم تێچووی بەشداربووان لەلایەن وەزارەتی دەرەوەی هۆڵەندا لەئەستۆ گیراوە.  

 

بۆچی گرنگە: پرۆژەی ڕاهێنانەکە، یەکێکە لە پرۆگرامە گرنگەکانی وەزارەتی دەرەوەی هۆڵەندا، تایبەتە بە راهێنانی ڕۆژنامەنووسانی ڕۆژهەڵاتی ناوەڕاست و باکووری ئەفریقا. عێراق و هەرێمی کوردستانیش یەکێکن لەو وڵاتانەی ئەم پرۆژەیە دەیانگرێتەوە و ڕۆژنامەنووسانی خاوەنی وڵاتینامەی عێراق دەتوانن سوودمەندبن لەم دەرفەتە.

 
مەرجە داواکراوەکان: ئەوانەی خوازیاری بەشداریکردنن لە کۆرسەکاندا پێویستە چەند مەرجێکیان تێدا بێت، گرنگترینیان: 

 

·   بەشداربوو پێویستە لەعێراقدا بژی و کاربکات

·     تەمەنی لەنێوان 20 بۆ 45 ساڵ بێت

·  زمانی ئینگلیزی بەباشی بزانێت

·  لە یەکێک لەو بوارانەدا کار بکات کە پرۆگرامەکە بۆی گرنگە

 

چۆنییەتی بەشداریکردن: ئەوانەی دەخوازن بەشداری کۆرسەکان بن، هەتا 26ـی ئاداری 2024 کاتیان هەیە و دەتوانن لە ڕێگەی ئەم لینکە داواکارییەکانیان پێشکەش بکەن.