قوباد تاڵەبانی:  خوازیاری پێکهێنانی حکومەتێکی کارا و خزمەتگوزارین

ئاڤا نیوز

 

ئەمڕۆ شاندی یەکێتی بەسەرۆكایەتی قوباد تاڵەبانی، لەبارەی پێکهێنانی حکومەت سەردانی یەکگرتووی ئیسلامی و بزووتنەوەی گۆڕانی کرد، هەردوو لایەنیش بە راشکاوی بە شاندی یەکێیتیان وتووە بەشداری حکومەت ناکەن و دەبنە ئۆپۆزیسیۆن.

 

چیرۆکی سەرەکی: ئەمڕۆ پێنجشەممە 2024/11/28، قوباد تاڵەبانی، جێگری سه‌رۆكوه‌زیرانی حكومەتی هه‌رێمی كوردستان، لەگەڵ ئیڤێت کوپەر، وەزیری ناوخۆی بەریتانیا كۆبووەوە و پرسی پێکهێنانی حکومەتی داهاتوویان تاوتوێ كرد.

 

وێنە گەورەکە: پارتی و یەکێتی لەسەروبەندی پێکهێنانی کابینەی نوێی حکومەتن، لە دوێنێوە گەڕی دانووستانەکانیان دەستپێکردووە و بە جیا سەردانی چەند لایەنێکیان کردووە.

 

ڕاگەیێنراوی فەرمی: نووسینگەی ڕاگەیاندنی جێگری سه‌رۆكوه‌زیرانی هه‌رێمی كوردستان ڕایگەیاند، لە كۆبوونەوەی قوباد تاڵەبانی و ئیڤێت کوپەر، پرسی پێكهێنانی كابینەی نوێی حكومەت و چۆنیەتی پتەوکردنی پەیوەندییەکان لە بواری ئەمنی و ڕێگریکردن لە دیاردەی کۆچی نایاسایی، تاوتوێ کران.

 

ئەوەی پێویستە بیزانیت: ئەمڕۆ یەکێتی نیشتمانی کوردستان لەبارەی پێکهێنانی حکومەت لەگەڵ بزووتنەوەی گۆڕان کۆبووەوە. بزووتنەوەی گۆڕان بە شاندی یەكێتی ڕاگەیاندووە، نیازی بەشداریكردنییان لە حكومەت نییە و دەخوازن پارتی و یەكێتی هەنگاوەكانی پێكهێنانی حكومەت و كاراكردنەوەی پەرلەمان خێراتر بكەن، لەسەر بنەمای ستراتیژی نیشتمانی دانووستان بكەن، لەپێناو خزمەتكردنی هاووڵاتیانی هەرێمی كوردستان.

 

ئەمەش بزانە: هەر ئەمڕۆ شاندی یەکێتی بەسەرۆكایەتی قوباد تاڵەبانی، سەردانی یەکگرتووی ئیسلامی کرد و لەلایەن سەلاحەدین محەممەد بەهائەدین، ئەمینداری گشتی یەكگرتووی ئیسلامیی كوردستان، پێشوازیی لێكرا. هاوکات لە كۆبوونەوەی نێوانیاندا هەردوولا هاوڕابوون لەسەر گرنگی پێكهێنانی دامەزراوەكانی هەرێمی كوردستان لەسەر بنەمای خزمەتكردنی باشتری هاووڵاتیان.

 

لەلایەکی دیکەوە: قوباد تاڵەبانی، جێگری سەرۆکوەزیران و سەرۆکی شاندی دانوستانکاری یەکێتی بۆ پێکهێنانی حکومەت، لەمیانی کۆبوونەوەی لەگەڵ ئیڤێت کوپەر، وەزیری ناوخۆی بەریتانیا باسی پێکهێنانی حکومەتی کرد و ڕایگەیاند، خوازیاری پێکهێنانی حکومەتێکی کارا و خزمەتگوزارن کە بتوانێت کێشە بنەڕەتییەکانی خەڵکی کوردستان بە تایبەتیش کێشە ئابورییەکان و خزمەتگوزارییەکان چارەسەر بکات و دۆخی ژیان و گوزەرانی هاوڵاتییان باشتر بکات.

 

زانیاریی زیاتر: بڕیارە هەفتەی داهاتوو هەوڵەکان بۆ پێکهێنانی حکومەت چڕبکرێنەوە و  پارتی و یەکێتی وەکو براوەی یەکەم و دووەمی هەڵبژاردن کۆببنەوە.