سەرەتای هەفتەی داهاتوو پارتی و یەکێتی کۆدەبنەوە

ئاڤا نیوز

سەرەتای ئەم هەفتەیە شاندی دانووستانکاری پارتی دیموکراتی کوردستان، سەردانی یەکێتی نیشتمانی کوردستان دەکات، گوتەبێژی یەکێتی لەوبارەیەوە دەڵێت "گفتوگۆکان لەبارەی پێکهێنانی حکومەت و پۆستەکان دەبن".

 

وێنە گەورەکە: ڕۆژی 2-12-2024، بڕیارە یەکەم کۆبوونەوەی پەرلەمانی کوردستان بەڕێوەبچێت، لایەنە سیاسییەکانیش لە هەوڵدان ئەو کۆبوونەوەیە بەبێ کێشە بەڕێوەبچێت.

 

لێداوانی فەرمی: سەعدی ئەحمەد پیرە، گوتەبێژی یەکێتی نیشتمانی کوردستان بە ئاڤا نیوزی ڕاگەیاند: پێشوازی لە شاندەکەی پارتی دەکەین، گفتوگۆکانیش لەبارەی پرسی پێکهێنانی حکومەت و پۆست و بەرپرسیارێتییەکان دەبن.

 

 هاوکات، سەعدی ئەحمەد پیرە بێ ئاگایی خۆی لە شوێنی بەڕێوەچوونی کۆبوونەوەکەی نێوان حزبەکەی و پارتی نیشاندا و گوتی: "هێشتان پێیان نەگوتووم لە کوێ کۆبوونەوەکە دەکرێت"، بەپێی قسەی سەعدی پیرە گفتوگۆی یەکێتی و پارتی لەگەڵ لایەنەکانی دیکە تەواو بووە.

 

لەلایەکی دیکەوە: چیا هەرکی، یاریدەدەری مەکتەبی ڕێکخستنی پارتی لە هەولێر، بە ئاڤا نیوزی ڕاگەیاند: شاندنی دانووستانکارمان لەگەڵ لایەنە سیاسییەکانی سلێمانی کۆدەبنەوە، سەردانەکەش پێدەچێت ڕۆژی یەکشەممەی هەفتەی داهاتوو بێت.

 

ئەو بەرپرسەی پارتی دەڵێت: شاندەکە جگە لە یەکێتی لەگەڵ لایەنەکانی دیکەش جارێکی دیکە کۆدەبینەوە، چونکە دەمانەوێت یەکەم کۆبوونەوەی پەرلەمان بە بێ کێشە بەڕێوەبچێت.

 

ئەوەی پێویستە بیزانیت: پارتی کە براوەی یەکەمی هەڵبژاردنی خولی شەشەمی پەرلەمانی کوردستانە، خاوەنی 39 کورسییە و تاوەکو ئێستا لەگەڵ نەوەی نوێ، یەکگرتوو، کۆمەڵی دادگەری کۆبوونەوەی کردووە.