لە سلێمانی شاندی دانووستانكاری پارتی سەردانی یەکێتی دەکات

ئاڤا نیوز

 

ئەندامێكی لیژنەی دانووستانكاری پارتی ڕایدەگەیەنێت، شاندێكی چواركەسییان بە سەرۆكایەتی هۆشیار زێباری، پاشنیوەڕی ئەمڕۆ شەممە لە سلێمانی سەردانی یەكێتی دەكەن.

 

وێنە گەورەكە: پارتی و یەكێتی بەجیا سەردانەكانیان بۆ لای حیزب و لایەنە سیاسییەكان دەستپێكردووە بۆ گفتوگۆكردن لەبارەی پێكهێنانی كابینەی دەیەمی حكومەتی هەرێمی كوردستان و بەڕێوەچوونی یەكەم دانیشتنی پەرلەمانی كوردستان، ئەمڕۆش هەردوو براوەی یەكەم و دووەمی هەڵبژاردن بەیەكەوە كۆ دەبنەوە.

 

لێدوانی فەرمی: دڵشاد شەهاب، ئەندامی لیژنەی دانووستانکاری پارتی بە ئاڤا نیوزی ڕاگەیاندووە، "ئەمڕۆ شەممە 30/ 11/ 2024، شاندی دانووستانکارمان سەردانی یەکێتیی نیشتمانیی کوردستان دەکەین لە شاری سلێمانی، پرسی پێكهێنانی كابینەی دەیەم و ڕێكارە یاساییەكانی دوای ڕاگەیاندنی ئەنجامەكانی هەڵبژاردنی خولی شەشەمی پەرلەمانی كوردستان، تاوتوێ دەكەین".

 

زانیاری بەدەستهاتوو: شاندی دانووستانكاری پارتی دیموکراتی کوردستان بۆ لای یەكێتی پێکهاتووە لە هۆشیار زێباری، ئەندامی مەكتەبی سیاسی و سەرۆکی شاند، پشتیوان سادق، دڵشاد شەهاب، ئومێد سباح ئەندامانی شاند.

 

لەلایەکی دیکەوە: بەگوێرەی ئەو زانیارییانەی بەدەستهاتوون، شاندی پێشوازیکاری یەکێتی پێکهاتوون لە: قوباد تاڵەبانی، سەرۆکی شاند، ڕێواس فایەق، ڕزگار حاجی حەمە، سالار سەرحەد و سەمیر هەورامی.