ئومێد خۆشناو: وەڵامدانەوەی 77 پرسیارەكەی سەرژمێری بۆ داهاتوو زۆر سوودی دەبێت

ئاڤا نیوز

 

پارێزگاری هەولێر ئاماژە بۆ ئەوە دەدات وەڵامی ئەو 77 پرسیارەی كە لە قۆناغی سێیەمی پرۆسەی سەرژمێری ئاراستەی هەر خێزانێك دەكرێن، گرنگن و بۆ داهاتوو بۆ زۆر بابەت سوودیان لێوەردەگیرێت.

 

لێدوانی فەرمی: ئومێد خۆشناو، پارێزگاری هەولێر لە كۆنفڕانسێكی ڕۆژنامەوانیدا ڕایگەیاند: ئەمڕۆ لە سنووری پارێزگای هەولێر، هاوشێوەی پارێزگاكانی دیكە، قۆناغی سێیەمی پرۆسەی سەرژمێری دەستیپێكردووە و تیایدا 77 پرسیار ئاراستەی هەر خێزانێك دەكرێت، وەڵامی ئەو پرسیارانەی تۆمار دەكرێن زۆر گرنگن بۆ ئێمە و لە داهاتوودا بۆ زۆر بابەت سوودیان لێوەردەگیرێت.

 

زانیاریی زیاتر: بەپێی ڕێنماییەکان، دەبێت سەرۆكی خێزان وەڵامی پرسیارەكان بداتەوە، ئەگەر ئەویش ئامادە نەبوو كەسێكی دیكەی خێزانەكە دەتوانێت ئەو كارە بكات بەمەرجێك تەمەنی لە 18 ساڵ كەمتر نەبێت.

 

لەلایەكی دیكەوە: سەبارەت ئەو هاونیشمانییانەی كە خەڵكی ناوچە كوردستانییەكانی دەرەوەی هەرێمی كوردستانن، ئومێد خۆشناو ڕاشیگەیاند: پێویستە هەر خێزانێك كەسێكی بگەڕێتەوە ناوچەكەی خۆی تاوەکو وەڵامی 77 پرسیارەكە بداتەوە بۆ ئەوەی ئەم قۆناغەش هاوشێوەی دوو قۆناغی ڕابردووی سەرژمێری سەركەوتووبێت.