کارنامەی یەکەم دانیشتنی خولی شەشەمی پەرلەمان دیاریکرا

ئاڤا نیوز 

 

پەرلەمانی کوردستان کارنامەی کاری یەکەمین دانیشتنی ئاشکرا کرد، هەر لەو دانیشتنە پەرلەمانتارانی هەڵبژێردراو سوێندی یاسایی دەخۆن. 

 

لێدوانی فەرمی: سامان ئەحمەد، بەڕێوەبەری ڕاگەیاندنی پەرلەمانی  کوردستان، بە ئاڤا نیوزی ڕاگەیاند، بەپێی بڕیاری مادەکانی 46 و47 و 48 لە یاسایی هەڵبژاردنی پەرلەمانی کوردستان، ژمارە 1ـی ساڵی 1992ـی هەمووارکراو و ماددەی 2ـی لە پەیڕەوی ناوخۆی پەرلەمانی کوردستان، دانیشتنی یەکەمی خولی پایزەی ساڵی یەکەمی خولی هەڵبژاردنی شەشەمی پەرلەمانی کوردستان لە کاتژمێر 11ـی پێشنوەڕۆی ڕۆژی دووشەممە 2- 12- 2024 بەڕێوەدەچێت.

 

زانیاریی زیاتر: سامان ئەحمەد، دەڵێت، یەکەم دانیشتن بانگێشتی بەتەمەنترین کاندیدی ئامادە بوو لە پاڵێوراوانی سەرکەوتووی خولی شەشەمی هەڵبژاردنی پەرلەمانی کوردستان دەکرێت بۆ بەرێوەبردنی دانیشتنەکە.

 

 لەلایەکی دیکەوە: سەرۆکی یەکەم دانیشتنی خولی شەشەمی پەرلەمانی کوردستان کاندیدە هەڵبژێردراوەکان بانگ دەکات بۆ سوێند خواردنی یاسایی، پاشان دانیشتنەکە لەلایەن سەرۆکی یەکەم دانیشتنی پەرلەمانی کوردستان بەڕێوەدەبرێت.